Melkproduksie kan weer groei
MELKPRODUKSIE kan later vanjaar herstel en met sowat 2% groei, sê dr. Koos Coetzee, ekonoom van die Melkprodusente-organisasie (MPO). Daarteenoor het melkproduksie verlede jaar met 0,5% gekrimp.
Coetzee het op ’n MPO-mediako nferensie gesê boere benodig ’n voerprys-tot-melkprys-verhouding van sowat 1:4 om gelyk te speel. As die verhouding tot 1:6 verander, kan melkboerderye meer winsgewend raak.
Sedert April verlede jaar het die mielieprys reeds met 29% gedaal, die sojaprys met 16% en voerpryse met 24%, terwyl die gemiddelde produsenteprys met 9% gestyg het.
In die binneland is daar danksy goeie somerreën goeie
somergraangewasse en ruvoerbeskikb aarheid. Koeie se kondisie is egter nie altyd goed nie omdat boere verlede jaar minder voer gehad het.
Coetzee sê hoewel dit in die suide van Suid-Afrika baie droog is, het melkproduksie daar in ’n vorige droogte gestyg toe boere hul koeie meer graan gevoer het.
‘GEBRUIK GELEENTHEDE’
Mnr. Bertus van Heerden, bestuurder van die MPO se eenheid vir landbou-ekonomie, het boere aangemoedig om mielies op termynkontrakte te koop.
“’n Boer wag dikwels te lank voordat hy begin om pryse vas te maak. ’n Mens kan eerder vroeër begin en dit in klein hoeveelhede doen as om die beskikbare geleenthede heeltemal mis te loop.”
Dr. Chris van Dijk, uitvoerende hoof van die MPO, het gesê die melkbedryf se bydrae tot die ekonomie was verlede jaar R14,5 miljard. Dit bied werk aan sowat 50 000 plaaswerkers, met gemiddeld een werker vir elke 50 koeie.
Op 11 Mei was daar 1 550 melkboere, van wie 75% vrywillig lid van die MPO is. Die dalende getal melkboere is vir die MPO ’n bekommernis, maar Van Dijk sê wêreldwyd word melkboerderye ál groter, en ondanks Suid-Afrika se dalende getal melkboere, neem melkproduksie toe.
“Ons getal koeie het die afgelope klompie jare omtrent dieselfde gebly, maar minder boere produseer meer melk,” het Coetzee gesê.
KOMMUNIKEER BETER
Van Dijk sê die MPO het onlangs begin om maandelikse telekonf erensies met belanghebbendes in die waardeketting te hou, soos banke, kleinhandelaars, sekere staatsdepartemente en markkom mentators. Dit is met die doel om gestruktureerde kommunikasie in die waardeketting te bewerkstellig.
“Dit het voorheen gebeur dat rolspelers verkeerde inligting oor moontlike melktekorte kry en dan op grond daarvan onder meer bestellings vir invoer plaas.”
Hy sê transformasie in die melkbedryf is ’n gegewe en baie belangrik. “Ons moet dit doen, maar moet dit wetenskaplik aanpak.
“Dit is ’n doodsvonnis om net vir iemand 20 koeie te gee en te sê hy moet begin melk.”
Die MPO wil bestaande swart sakelui nader om in bestaande melkboerderye te belê. Sy instituut vir suiwelte gnologie sal tegniese bystand, mentorskap, blootstelling en opleiding bied.
‘’n Boer wag dikwels te lank voordat hy begin om pryse vas te maak.’