Landbou in KwaZulu-Natal
Die jaarlikse Royal-skou het in 1851 begin en sedertdien ontwikkel tot een van die grootste landbouskoue in Suid-Afrika.
Die Royal-skou in Pietermaritzburg is vanjaar vir die 167ste keer ’n vertoonvenster vir die landbou in KwaZulu-Natal. Die skou duur tien dae (26 Mei tot 4 Junie) en bied hope inkopie- en vermaakgeleenthede vir die hele gesin, onder meer ’n speelpark en verskeie musiekkonserte.
In hart en siel is dit egter ’n landbouskou. Die skou het oor die afgelope anderhalwe eeu tot een van Suid-Afrika se belangrikste landbouskoue gegroei. Die landbouprogram lê veral klem op die veebedryf, maar daar is genoeg werktuie van verskillende maatskappye sodat besoekers ’n wye verskeidenheid landboumasjinerie kan sien.
LEER OOR LANDBOU
KwaZulu-Natal se grootste vertoning van boutoerusting en -materiaal, asook hanteringstoe- rusting is te sien. Dit behels ’n verskeidenheid van meer as 400 kommersiële, industriële en dienssektor-uitstallings.
Soos gewoonlik sal talle beeste, skape, bokke, hase en voëls te sien wees. Dit sal nie net aanklank vind by diegene wat regstreeks by die landbou
betrokke is nie, maar ook by die algemene publiek. Die skaapen beesuitstallings, asook die suiwelstal sal daarop klem lê om vir stadsjapies met uitstallings en interaktiewe demonstrasies meer oor dié bedrywe te leer en hul nuuskierigheid te bevredig.
Die Royal-skou bied vanjaar ook die nasionale kampioenskappe van die Ile de France- en Hampshire Downskaaprasse aan. Die KZN-gedeelte van Toyota SA se nasionale jeugafslaerskompetisie word op Saterdag 27 Mei gehou.
GROND TOT MOND
In die Mercury Hall of Fine Living word geleenthede oor kos en kookkuns aangebied.
Ook hier word die rol van die primêre landbou in die kollig geplaas. Besoekers kan meer leer oor voedselproduksie – van waar dit op die landerye verbou word tot by ’n gedekte tafel in die eetkamer.