Suur strem somersaaiery
’n Vrystaatse landboukundige sê hy het in die afgelope tyd in honderde saailand-profielgate in dié provinsie en Noordwes ’n ondergrondse laag suur grond opgemerk wat wortelgroei erg gestrem het. ’n Grondkundige gee raad hoe jy dit met bewaringslandbou kan
Die Vrystaatse landboukundige dr. Jan Strydom sê versuring vorm ’n chemiese keerlaag in saailande. Hy het die afgelope twee seisoene telkemale in profielgate min of meer op 30 cm-gronddiepte suur lae teëgekom. Telkens het hy gesien hoe dit wortelgroei op dié laag laat afstomp of dwars laat draai het sodat dieper vog nie benut kon word nie.
Die gronde se effektiewe worteldiepte (tot waar wortels potensieel kan groei) was veel meer – in party gevalle tot 1,5 m diep – met onbenutte vog onder die suurlaag.
Jan, verbonde aan die kunsmismaatskappy Profert, het in naastenby 300 van die profielgate grondmonsters op 12 cm, 18 cm, 24 cm en 30 cm diep geneem, en in sommige profiele, in grond met potensiaal vir dieper wortelontwikkeling, ook op 36 cm, 42 cm, 48 cm en 54 cm.
Die laboratoriumontledings het bykans deur die bank suurversadiging van tot meer as 50% op gemiddeld 30 cm diep getoon. Hierdie suur laag was in party gevalle tot 24 cm vlak.
Dit was duidelik dat die versuring nie net wortelontwikkeling vlak laat staak of dwars
laat draai nie, maar ook haarwortelvorming drasties benadeel, sê Jan.
Hy skryf die probleem daaraan toe dat grond al hoe vlakker en minder bewerk word namate boere in die rigting van geenbewerking beweeg. Kalk word gevolglik nie genoegsaam in die grond ingewerk nie.
Dit lyk of die beitelploegbewerkings wat algemeen in dié dele tot op sowat 30-35 cm diep gedoen word, weens die werktuig se ontwerp bloot die kalk weer op die oppervlak agterlaat, van waar dit nie vanself in die grond in kan afbeweeg nie.
Jan het nou met die hulp van ’n ingenieur ’n werktuig ontwerp waarvan die tande teen 21 grade loop. Dit het die vermoë om die kalk op die oppervlak via geute agter die tande in die grond in te laat inval. Só word verseker dat soveel as moontlik van die kalk wat aanvanklik bo-op die grond uitgestrooi is, tot op ’n gekose diepte in die grond geplaas word.
Hy sê dié werktuig is in ’n toetsfase. Dit sal bekend gestel word sodra hy gereed is om dit kommersieel beskikbaar te stel. Blaai om vir die kassie “Hospitaliseer gerus suur grond”.