DEUR DIE BESOEKERS SE OË

Mnre. Walter Diembeck van Hamburg en Günter Krause van Werl is stoere Duitse geesdriftiges wat saam met ’n groep Britte en Swede Sandstone besoek het.

Günter, die voorsitter van die Duitse vereniging vir spoorweg geskiedenis, beskryf die groep se verknogtheid aan erfgoed en treine as “malligheid”, maar sal vir geen geld ter wêreld die moeite ontsien om die versameling te beleef nie. Hy het veral uitgesien om ’n klein stoomlokomotief uit die Eerste Wêreldoorlog, waaroor hy al ’n boek geskryf het, te besigtig.

Walter het Suider-Afrika se spoornetwerk in die stoomtyd tydens ’n besoek sowat 45 jaar gelede al beleef. Nou, ná sy aftrede, besoek hy ens y medelede van die vereniging geskiedkundige trein gebeurtenisse.

Mnr. Paul Gordon is’n boorling van Kaapstad wat al die pad Vrystaat toe gereis het.

Volgens hom ly hy van kindsbeen af aan “geelmetaal”-koors, wat verwys na sy voorliefde vir grondverskuiwings toerusting, trekkers en dieselenjins. Hy stel ook baie in Sandstone se stoomvoertuie belang.

Op sy volgende besoek gaan hy sy bejaarde Walliese pa saambring.

Mnr. Apie Richter van Piketberg is ’n ondersteuner met diesel in sy are. Hy en sy tweelingbroer, Hennie, van Yzerfontein, was saam met lede van die Wes-Kaapse tak van die Suid-Afrikaanse Federasie van Veteraantrekker-en-enjinklubs (Savtek) betrokke by die trekker-afdeling van die fees.

“Hier is vir elke belangstelling en smaak iets van spesiale betekenis: Stoom, enjins wat met saamgeperste lug aangeskakel word, en gereedskap en toerusting wat ek as sewentigjarige laas in my weermagdae mee te doen gekry het.” As hy een voertuig met sy terugkeer kon saamneem, sou dit ’n Series I Land Rover wees wat aan die polisie behoort het. “Sy toestand lyk asof dit nog net ’n paar generaals rongekarwei het.”

Me. Josefina Pitra Diakité, Angola se ambassadeur in Suid-Afrika, het Stars of Sandstone amptelik geopen. Sy was beïndruk met die lokomotiewe wat uit haar land se suikerplantasies kom en vir Sandstone gerestoureer is. “Die bewaring van dié treine is ’n voorbeeld van samewerking waarop ons buurlande trots kan wees.”