ROTTWEILER
Die Rottweiler is groot, sterk, kalm en gemoedelik, sê mnr. Chris Pretorius van die Westelike Provinsie Rottweilerklub. Die hond se moed en durf is sonder weerga en hy kan goed tussen ’n ontspanne situasie en ’n bedreiging onderskei. Hy kan gou kalmeer nadat hy onder druk geplaas is. In die moderne misdaadsituasie is hy veral op plase en hoewes waardevol, maar moet gehoorsaamheidsafrigting kry voor hy te sterk word.
Seleksie. Dit is ’n waagstuk om ’n ongeregistreerde hondjie te koop. Temperament en ’n gesonde struktuur kan in die slag bly met onverantwoordelike teling.
’n Hond kan meer as ’n dekade saam met die gesin wees. Dit is daarom verbasend hoeveel mense tevrede is met ’n substandaard hond en min navorsing doen voor hulle die diere koop.
Voornemende kopers wat duur betaal vir ’n hondjie, koester sekere verwagtinge. Hulle aanvaar dat hulle met ’n vakkundige persoon te doen sal hê. Dit sal iemand wees wat ervare is met die teel, skou en afrigting van honde en iemand wat goeie nasorg kan lewer. Die koper aanvaar die ouerpaar is deur spesialis-beoordelaars getoets vir die korrekte tipe, selfvertroue, goedaardigheid en dapperheid. Skoutitels en werkskwalifikasies toon gehalte.
Waak teen agterplaas-telers wat nie hul werpsels registreer nie en wat vaag is oor die reun van die werpsel. Vermy die teler wat hondjies al op ses weke verkoop; dit kan wees om op inentingskoste te bespaar.
So iemand sal dikwels ook die werpsel op ’n minderwaardige rantsoen grootmaak.
Hoe eenvormiger die werpsel is, hoe beter is die teling. Kyk vir selfvertroue as jy ’n hondjie kies: Een wat maklik self kontak maak met ’n volslae vreemdeling en graag hanteer word – een wat sommer aan jou skoenveters begin trek. ’n Hondjie wat maklik uitgelok kan word om te speel en ’n bal agternasit, lei die maklikste op.
Opleiding. Soos met enige ander ras, behoort ’n Rottweiler van kleins af met besoekers en veral kinders gesosialiseer te word. Dit is noodsaaklik dat hy ook toegang kry tot die binnekant van die huis.
Begin opleiding op sowat ses maande. Dan is die hond nog verstandelik en fisiek plooibaar en hoef jy nie jou krag teen hom in te span nie. Sluit verkieslik by ’n ervare opleier of groep aan. Waak teen opleiers wat hardhandig is. Kry wenke by Rottweilerklubs en/of ’n betroubare veearts.
Veiligheidswenke. Laat die hondjie vroeg al met plaasdiere in aanraking kom deur hom saam in die bakkie veld toe te laat ry en in lamtyd saam met hanslammers agterin terug te keer huis toe. Só sal hy vroeg kleinvee gewoond raak. Die hoof-inprentingstadium in enige hond se lewe is die eerste vier of vyf maande. As hy uitgegroei is, sal hy saam met jou deur ’n skaaptrop kan stap sonder dat hulle sy jaginstink uitermatig prikkel.
Wat sekerheid betref, werk ’n omheinde opstal met honde daarbinne die beste. Dit skakel die verrassingselement uit.
As jy die hond saamneem wanneer jy iewers heen ry, is dit ’n goeie plan om hom met jou tuiskoms eerste die huis in te stuur. As jy hom vooraf leer dat daar altyd in élke vertrek ’n flentertjie biltong in die middel van die vloer lê, sal hy flink deur elke vertrek hardloop die oomblik dat jy hom inlaat. NAVRAE: www.wprc.org.za; cprottie@iafrica.com