Hortgro belê miljoene in werksmag van die toekoms
DIE sagtevrugtebedryfsliggaam Hortgro het bykans R4 miljoen bewillig in beurse en opleiding aan universiteite as ’n belegging in die toekoms van SuidAfrika se landbouwerksmag.
Hortgro het die afgelope 14 jaar sowat R35 miljoen in beurse belê.
Vanjaar trek studente aan die Universiteit Stellenbosch, die Kaapse Skiereiland Universiteit van Tegnologie, Elsenburg en die universiteite van Limpopo, Pretoria en die Vrystaat voordeel uit die R3,7 miljoen wat Hortgro in die bedryf terugploeg. Die organisasie finansier altesame 68 studente, van wie 41 met nagraadse studie besig is. Die beursskema word saam met die kern en steenvrugtebedryf, AgriSeta en die Sagtevrugteontwikkelingstrust bedryf.
“Dit is nodig om steun te bied vir die ontdekking en opleiding van die beste intellektuele en die ontwikkeling van ’n sterk arbeidsmag,” sê mnr. Anton Rabe, uitvoerende direkteur van Hortgro.
Die waarde van die sagtevrugtebedryf beloop sowat R11 miljard en ’n opgeleide arbeidsmag is noodsaaklik om dit verder uit te bou, sê Rabe.
Dr. Xolani Siboza, ’n vrugteproduksienavorser by Hortgro Science, het in ’n landelike omgewing grootgeword en ook met ’n beurs studeer.
Hy het beklemtoon watter skaarste daar aan opgeleide mense in die landbou is.
“Ons benodig mense met nuwe energie in die veld, jong mense wat leiding kan neem om die bedryf te hernu en uit te brei.”
“Daar moet nog harde werk gedoen word om jong mense te oortuig dat ’n loopbaan in die landbou vir hulle voordelig sal wees. Die tuinbou en tegnologiebedryf is besig om te ontwikkel en daar lê talle geleenthede oor die volgende 20 tot 30 jaar voor,” sê Rabe.
–