DIE ANDER SÊ
’n Direkteur wat glo as taxibestuurder werk, is onder diegene wat verlede jaar deur die Regering aangestel is om miljoene rande se droogtehulp aan boere in sewe droogtegeteisterde provinsies te verleen.
Agri SA het op ’n mediakonfrensie gesê die Regering se diensverskaffers vir droogtehulp het nie “verstaan hoe die landbou werk nie” en het soms na bewering pryse oormatig gelaai.
Rapport kon die volgende oor ván die diensverskaffers vasstel:
Michael Bolokang, direkteur van Xpel Marketing and Communication, wat voer in Limpopo moes verskaf, werk volgens inligting van die kommissie vir maatskappye en intellektuele eiendom (CIPC) as ’n taxibestuurder by die Taung Taxi Association, maar hy ontken dit. Hy is van Mmabatho in Noordwes.
Alfred Mthimkhulu, enigste direkteur van Tshipa Investments, aan wie ’n kontrak van R25 miljoen toegeken is om voer in Mpumalanga te lewer, het in 2015 getender om “3 000 fietse, valhelms, lugpompe, glimbaadjies, pamflette oor padtekens en opleiding” aan die Gautengse departement van paaie te verskaf.
Oor Letlotlo Growth Investments, Safco Holdings Primary Cooperative Limited en Croplands Agricultural Equipment, wat saam R74 miljoen se kontrakte gekry het, is bitter min inligting op die internet beskikbaar.