Wêreldrekordprys vir sybokhaar verbeter
GESKIEDENIS is verlede week in Port Elizabeth gemaak toe ’n baal somerkleinbokkiehaar teen ’n wêreldrekordprys van R896/kg verkoop is. Dit verbeter die vorige rekord, wat verlede jaar opgestel is, met R37/kg.
Die rekordprys is op ’n spesiale veiling by die hoofkantoor van Sybokhaar Suid-Afrika in Port Elizabeth behaal. Altesame 15 bale sybokhaar wat vir die gesogte Ermenegildo Zegna-kompetisie vir somerkleinbokkiehaar ingeskryf is, het onder die hamer gekom.
Die verkoper was Van Hasselt-boerdery van Prins Albert en die koper Stucken & Company van Uitenhage. Die opbrengs van die baal, wat deur me. Gay van Hasselt geklas is, was ’n verstommende R73 561.
Die 15 bale wat aangebied is, se omset was bykans R785 000. Stucken & Co en Samil was die enigste kopers. Twee ander bale van onderskeidelik mnre. Billy Colborne & Seun van Willowmore en mnr. J.H Lategan van Aberdeen is verkoop. Eersgenoemde is teen R867/kg verkoop, terwyl laasgenoemde R801/kg behaal het.
Wat die prestasie uitsonderlik maak, is dat dié pryse betaal is in ’n seisoen waarin die sybokhaarmark skerp teruggesak het.