STAAT SE PLAN MET SY LANDBOUGROND
DIE staat gaan alle onderbenutte landbougrond in sy besit vir produksie benut om grotendeels huishoudelike voedselsekerheid te verseker, het die Departement van Landelike Ontwikkeling en Grondhervorming aangedui.
Hy het die Parlement se portefeuljekomitee vir landelike ontwikkeling en grondhervorming ingelig dat hy dit gaan vermag met sy een-hektaar-een-huishouding-twee-koeieprojek. Die projek word gesien as ’n oplosin sing om meer landbougrond vir produksie te benut siende dat syfers van Statistieke SA toon daar is ’n 9,1% afname (vanaf 2,9 miljoen in 2011 tot 2,3 miljoen in 2016) in die aantal huishoudings wat betrokke is by landbouproduksie.
Mnr. Bonginkosi Zulu, waarnemende adjunkdirekteur-generaal vir die herverdeling van grond en ontwikkeling by die departement, het gesê die grond wat vir die toepassing van die program geoormerk word, is staatsgrond onder voogdyskap van die departement, plase wat die staat onbenut bekom het, restitusiegrond, grond bekom vir plaaswerkers en -bewoners, meentgrond en selfs grond onder tradisionele leierskap.
Heelwat grond in KwaZuluNatal en Mpumalanga is onder voogdyskap van die staat.
Hy het verduidelik dat huishoudings die hele jaar sal werk deurdat hulle somer- en winterprodukte sal lewer.
Die huishoudings sal ook sertifikate vir grondgebruik ontvang wat by die aktekantoor geregistreer sal wees.
Vir die huidige boekjaar wil die departement 6 683 huishoudings help om onbenutte grond teen ’n koste van altesaam sowat R269 miljoen vir produksie te benut. Mnr. Justice Mnguni, ANC-LP, het egter bevraagteken of die departement op ’n wetenskaplike grondslag bepaal het hoeveel huishoudings per provinsie gehelp moet word.
Hy het gesê dat dit glad nie sin maak dat die departement 1 199 huishoudings in die Noord-Kaap wil help, maar slegs 163 in Gauteng nie.
In Noordwes wil hy 305 huishoudings help, in Limpopo 1 873, in Mpumalanga 615, in Kwazulu-Natal 675, in die Vrystaat 548, in die Oos-Kaap 1 025 en in die Wes-Kaap 949.