MÉÉR KLEM OP PRODUKTIWITEIT
DIE groeiende vraag na suiwelprodukte verplaas die klem gaandeweg ál meer na grootskaalse produksie en toenemende druk op produktiwiteit en doeltreffendheid, het dr. John Fetrow, emiritis-professor aan die kollege van veterinêre medisyne aan die Universiteit van Minnesota in Amerika en diplomaat vir die Amerikaanse raad van veterinêre praktisyne (suiwel), op die tiende SA grootkuddekonferensie by die Champagne Sportoord by Winterton gesê.
Die suiwelbedryf is steeds in ’n era van vinnige strukturele verandering. Tegnologie vir grootskaalse melkproduksie oorheers kommersiële produksie en die vervoer van die produkte. Net 9% van die melk wat wêreldwyd gelewer word, word internasionaal verhandel.
Die meeste van dié melk kom van ’n hand vol lande, soos Amerika, Nieu-Seeland en die Europese Unie.
Uitvoer van Suid-Afrika gaan grootliks na buurlande. As produksie verhoog kan word, kan uitvoer na ander lande, soos China, ’n werklikheid word.
Kommer oor die omgewing speel ’n rol in die wyse waarop produksie plaasvind.
“Daar is ál meer eise dat die suiwelbedryf toenemende aandag aan die bestuur van voedingstowwe, watergebruik en die vrylating van kweekhuisgasse bestee,” het Fetrow gesê.