Kongresbrokkies
prysgaping tussen fyn- en sterkwol kan teen die einde van die seisoen baie krimp, het mnr. Clarence Friskin, ondervoorsitter van die SuidAfrikaanse Wol- en Bokhaarkopersvereniging (Sawamba) op die kongres gemaan. Waar wol van 18-19 mikron die seisoen net met 8% verbeter het, het wol van 18 mikron se prys met 40,5% gestyg, het hy gesê. Gemeet oor 10 seisoene was die prysverskil tussen die kategorieë R7,57/kg, maar dit het oor die afgelope 12 maande tot R15/kg gestyg. Suid-Afrikaanse wolboere is grootliks deur die verswakking van die rand bevoordeel, aangesien wolpryse in dollarwaarde nie veel verskil van die begin van die 2016-’17-seisoen nie. Die huidige prys vir wol is tans $11,25 vergeleke met $10,75 twee jaar gelede. Daar is min verskil in die prys tussen skeersels op ses maande (46 mm) en agt maande (67 mm). In ’n studie van die Britstown-jongooiprojek is bevind dat boere wat drie skeersels in twee jaar gelewer het, gemiddeld net R1,51/kg meer in hul sak gesteek het as dié boere wat vier skeersels in twee jaar gelewer het. Gemeet oor drie jaar was die gemiddelde prys vir 70 mm-wol R144/kg skoonwol teenoor R129/kg skoonwol vir 40 mm-skeersels. Die kongres het versoek dat wol op veilings afgeslaan word op ’n skoonwolgrondslag en nie op ’n vetwolgrondslag nie, aangesien beter prysvergelykings só getref sal kan word. China bly die belangrikste koper van Suid-Afrikaanse wol, gevolg deur die Tsjeggiese Republiek. Elke baal wol is dié seisoen verkoop. Die naspeurbaarheid van wol en ekovriendelike produksiepraktyke sal ’n ál groter rol in die toekoms speel. Boere word aangemoedig om die Dumfries-verklaring te onderteken waarin hulle onderneem dat die wol aan die beste produksiepraktyke voldoen en ’n hernieubare bron, bio-afbreekbaar en herwinbaar is. In ’n verrassende stemming is mnr. Herman Hugo van Victoria-Wes tot nuwe mede-ondervoorsitter in die plek van mnr. Casper Labuschagne van Jamestown verkies. Mnre. Guillau du Toit, nasionale voorsitter, en Sipiwo Makinana, mede-ondervoorsitter, is eenparig herkies.