NWKV SE AANSIEN HOOG ONDER VERBRUIKERS

DIE Nasionale Wolkwekersvereniging (NWKV) geniet hoë aansien onder kommersiële wolboere wat dié diens gebruik. Cape Wools het die maatskappy Lighthouse aangestel om ’n onafhanklike meningsopname te doen en dié produksiediens te evalueer. Daarin is bevind dat die gemiddelde vlak van tevredenheid van 2014 tot 2016 met 10% verbeter het. In die geval van die NWKV se ekonomiese studiegroepe en genetiese adviesdienste was die styging 19%. Respondente het die belangrikheid van die diens ’n punt van 7,9 uit 10 gegee, wat ’n 5%-verbetering in dié tyd weerspieël.

In ’n verslag aan die nasionale kongres het mnr. Leon de Beer, hoofbestuurder van die NWKV, gesê die waarde van die skeersel in die kommunale gebiede het verlede seisoen tot R233,6 miljoen gestyg. Dit verteenwoordig ’n styging van 78,5% sedert 2015.

Altesaam 4,46 miljoen kg wol uit dié gebiede is op openbare veilings bemark, wat ’n verhoging van 78,5% verteenwoordig.

Daar is tans bykans 1 400 gemeenskappe met ’n beraamDie de 40 000 kleinboere wat met wolskape boer. Indien minimum lone as maatstaf gebruik word, is die inkomste wat uit wol verdien word, gelykstaande aan 6 000 werkgeleenthede.

Die NWKV se skeeropleidingsdiens het 57% meer skeerders opgelei as die mikpunt wat gestel was. Dit is danksy ’n bykomende R900 000 wat deur AgriSeta vir hierdie doel beskikbaar gestel is.

TOEKOMS

Cape Wools het die NWKV weer vir die volgende twee jaar as diensverskaffer aangestel. De Beer sê die klem sal hoofsaaklik op reproduksie, ekonomiese studiegroepe, nuwe tegnologie, netwerke tussen boere en die bevordering van wolskaapboerdery val. Die bekamping van roofdiere en dieregesondheid tel ook onder die sake wat voorrang geniet.

Die NWKV is ’n deelnemer aan Operasie Phakisa, ’n inisiatief wat uit pres. Jacob Zuma se kantoor bestuur word om die landbou in Suid-Afrika in die algemeen te bevorder.