Weertoepassings vir slimfone ‘nie akkuraat’

AANGESIEN geen toepassings op slimfone die weer 100% akkuraat kan voorspel nie, moet boere ’n hele paar daarvan aflaai en dan ’n gemiddelde berekening maak. Dié raad kom van prof. Willem Landman, ’n hoogleraar in meteorologie aan die Universiteit van Pretoria.

Landman het op die Nasionale Wolkwekersvereniging se jaarkongres in die Baai verduidelik hoe die El Niño- en La Niña-verskynsels die weerpatroon in Suid-Afrika raak.

“Hoewel die voorspellings ’n paar maande gelede gewys het ’n El Niño is weer op pad na Suid-Afrika, is dié wat dit interpreteer tans nie meer seker of dit wél die geval gaan wees nie. Dit beteken ook nie ’n La Niña-verskynsel is ons voorland nie.

“As daar iets gebeur, kan Suid-Afrika dalk ’n droër somertyd verwag. Vir boere wat egter nou al oor aanplantings moet besluit, sal dit raadsaam wees om tot September te wag om te kyk wat die weerpatroon gaan wees.” Landman glo egter die Wes-Kaap, wat tans ’n rampdroogte beleef, kan redelik goeie winterreën verwag.

Die kombinasie van klimaaten statistiese modelle in voorspellings help nou om betroubaarder voorspellings as in die 1980’s te maak. “Met seisoenale voorspellings op lang termyn kry ons dit drie uit vyf jaar reg. Met meer gesofistikeerde modelle en rekenaars kan dit verbeter, maar ’n plafon sal bereik word, wat ook nie 100% betroubaar sal wees nie,” het Landman gesê.