Meer buigbare versekering vir boere op pad
BATEVERSEKERING wat doelgemaak is vir die landboubedryf is by die onlangse Nampo-Oesdag bekend gestel. Dié produkte is saam deur die Land Bank se versekeringsfiliaal, Land Bank Insurance Company (LBIC), en TWK Agri ontwikkel. Dit sal na verwagting van aanstaande maand af beskikbaar wees nadat makelaars opgelei is daarvoor.
Mnr. Dini Nondumo, LBIC se uitvoerende bestuurder van verkope en verspreiding, sê die produkte is ontwikkel ná klagtes van boere dat daar nie kommersiële bateversekering is wat spesifiek op boere gerig is nie.
Dit maak volgens hom byvoorbeeld nie sin dat ’n boer in die Bronkhorstpruit-omgewing vir dieselfde kapingsrisiko as ander Gautengers moet betaal nie.
Die nuwe produkte is op drie vlakke ontwikkel: vir baie groot boere, vir mediumgroot en klein kommersiële boere, en vir opkomende boere.
Mnr. Kobus Stabelberg, TWK Agri se bestuurder van korporatiewe versekering, sê volgens hul navorsing het die algemene omvattende versekering wat die laaste tien jaar gebied word, vir baie boere te duur geword, veral vir opkomende boere, maar ook vir kleiner kommersiële boere.
“Ons het besef dit is nodig om die mark te segmenteer.”
Stapelberg sê groter boere bestuur hul risiko beter en behoort self te begroot vir verwagte
verliese, soos die ruite van hul vlootvoertuie, en ander kleiner eise. Sulke boere het egter steeds versekering nodig vir onverwagse en onvoorsiene verliese, soos brande en aanspreeklikheidseise, en ook sektorspesifieke en katastrofiese gebeure wat hul sake tot stilstand kan bring.
“Elke boer moet sy risiko en eisegedrag ontleed en op grond daarvan sy risiko-aptyt bepaal, asook in watter mate hy selffinansiering as deel van sy verskansingsopsies gaan gebruik,” sê Stapelberg. Hy sê die hele produksamestelling en -oplossing is op ’n model van verwagte verliese gegrond.
Mnr. Muzi Dladla, uitvoerende bedryfsbestuurder van LBIC, sê groot boere sal elkeen afsonderlik gehanteer word.
Vir mediumgroot boerderye sal daar ’n meer algemene produk wees, wat meer buigbaar as voorheen sal wees sodat boere dit kan struktureer.
Mnr. Maniki Rakgalakane, besturende direkteur van LBIC, sê dié boere wil gewoonlik dadelik vir ’n verlies vergoed word, en het ’n bekostigbare premie nodig. Dié versekeringsproduk sal ook premiefinansiering kan insluit, waar die premie deel kan word van ’n produksierekening en ná die oes betaal kan word.
Hy sê opkomende boere kan gewoonlik nie as individue versekering bekostig nie. Vir dié groep produsente sal versekering aan ’n groep opkomende boere gebied kan word ten opsigte van bates wat hulle deel sodat almal se onderskeie regte en belange beskerm word.