BYEWAS EN KASTEROLIE HELP NOU WYN BEWAAR
Die Franse kurkmaatskappy Diam het by die natuur gaan kers opsteek en ’n titsel kasterolie en byewas ingespan om splinternuwe wynkurke te ontwikkel wat geheel en al natuurlik is en doeltreffendheid waarborg.
Diam vervaardig nie wynkurke wat in hul geheel uit die bas van Quercus-bome gedruk word nie, maar gebruik kurkkorreltjies en ’n bindingsmiddel om kurkproppe saam te stel. Kurk is ’n uiters gewilde metode om wynbottels – veral duurder wyne – te verseël, maar weens trichloroanisool-besmetting (TCA), wat bysmake in wyn veroorsaak, het saamgestelde kurke die afgelope jare heelwat veld gewen.
Volgens mnr. Bruno de Saizieu, direkteur van kommersiële bemarking by Diam in Frankryk, word die kurkkorreltjies deeglik gesuiwer voor dit saamgepers word om kurkproppe te vorm.
“Slegs 30 nanogram TCA kan 11 miljard kurkproppe besmet. Ons moet dus seker maak elke kurkprop is vry van TCA,” het hy op die bekendstelling van die maatskappy se Origine-kurk in die Paarl gesê.
Ná die suiweringsproses word die kurkproppe met ’n bindingsmiddel gevorm. Een van hul probleme was egter dat die kurkkorreltjies droog en die kurkprop elasties moet bly sodat dit teen die bottelnek bly druk.
As dit nie gebeur nie, kan wyn tussen die kurkprop en bottelnek begin lek.
“Almal wil deesdae meer natuurlik wees, maar ons moet ook vooruitgang maak ten opsigte van deurdringbaarheid,” sê Bruno.
Hulle het die antwoord in kasterolie en byewas gevind. Kasteroliemolekules is gebruik om ’n nuwe bindingsmiddel te ontwikkel.
“Die mikroselle is heeltemal natuurlik, dis stabiel en boonop hidrofobies en dit keer dus dat die wyn in die kurk ingaan.”
Die gesuiwerde kurkkorreltjies word voorts met byewas omhul.
“Dit maak die kurk heeltemal waterdig, beskerm die wyn teen kapillêre migrasie en beskerm die kurkprop se elastisiteit.”
Versnelde verouderingstoetse het getoon wyn kan tot 30 jaar lank met so ’n seël gebêre word sonder dat dit iets oorkom. Organoleptiese toetse het ook aangedui die kurke veroorsaak geen smaakafwykings nie.
Bruno sê hulle het binne twee weke wêreldwyd sowat een miljoen van hierdie kurkproppe, wat sowat 30% duurder as hul ander produkte is, verkoop.