Witbasterpakket presteer wyd
Die wêreld naby Roedtan kan ongenaakbaar wees, maar as die reën reg val, is die vrugbare grond vrygewig. Om in daardie geweste munt te slaan uit mielies, is dit belangrik om die regte mieliebasterpakket aan te plant.
Die pakket witmieliebasters van Pannar het die afgelope seisoen vir mnr. Janlo Pienaar en sy seun Gerdehan ’n uitstekende oes gelewer. Ná ’n hand vol jare se knellende droogte het die 2016-planttyd goeie belofte ingehou. Mnr. Nico Bouwer, Pannar se verkoopsverteenwoordiger in Limpopo, werk reeds jare saam met die Pienaars. Hy het die witmieliebaster PAN 6Q-865BR vir sy stabiliteit, meerkoppigheid en siekteweerstand aanbeveel.
EIENSKAPPE
Nico sê die witmieliebaster PAN 6Q-865BR bevat die dubbel Bt-geen MON 89034, wat uitstekende beskerming teen stronkboorder bied. PAN 6Q-865BR is soortgelyk aan PAN 6R-845CBGT. Dit is ’n droëlandbaster wat goed aangepas is vir al die mielieproduserende gebiede en kan aangeplant word waar ’n enkele oes van mielies ook onder besproeiing verbou word. Dit bied weerstand teen diplodia-kopvrot en grysblaarvlek. Sy sterk meerkoppigheid maak dit ’n baster wat selfs in stremmingstoestande goed kan presteer.
PAN 6Q-865BR is in die mediumgroeiklas. Die benaderde dae van plant tot stroop (<15%) is 180 dae in warmer gebiede en 240 dae in koeler gebiede.
Janlo het die mielies teen ’n hoër plantestand as die aanbevole plantdigtheid aangeplant. “Ons het vertrou dat hierdie seisoen goed sou wees en ons was geseën met goeie reën op die regte tyd. Die stand van 75 000 plante per hektaar het goed vir ons gewerk. Die opbrengs was gemiddeld 10 ton/ha.”
BASTERPAKKET
Die witmieliebasterpakket van Pannar bied goeie prestasie, aanpasbaarheid en stabiliteit. Verkoopsverteenwoordigers en Pannar se landboukundiges kan jou help om die regte basters te kies vir jou plaas en omgewing.
Die volgende eienskappe speel almal ’n rol by die keuse van basters: groeiklas, opbrengspotensiaal en stabiliteit, staanvermoë, siekteen insekteweerstand, meerkoppigheid, kopen graaneienskappe, saadgrootte en gehalte, die baster se vereiste vir bestuur en die eindgebruik van die oes. Deur ’n pakket basters van verskillende groeiklasse aan te plant, word risiko die beste bestuur.
PAN 6Q-865BR en PAN 6B-465B is albei in die witmieliebasterpakket in die mediumgroeiklas en bevat die tweede generasie MON 89034-stronkboorderweerstandsgeen.
PAN 6B-465B is soortgelyk aan die basters PAN 6Q-445B en PAN 6Q-345CB.
Dit is hoofsaaklik droëlandbasters wat goed aangepas is vir al die mielieproduserende gebiede. Vermy laat plantdatums in die koel, oostelike dele. Die basters kan aangeplant word waar slegs ’n enkele aanplanting mielies onder besproeiing of aanvullende besproeiing verbou word.
Hierdie pakket bied goeie weerstand teen diplodia-kopvrot, grysblaarvlek en kop- en pluimbrand. Die basters het ’n goeie staanvermoë en redelik goeie verdraagsaamheid van aluminium.