NUWE BOORDSPUIT BESKERM OMGEWING
Rovic Leers het ’n nuwe gewasspuit ontwerp wat op die afgelope wêreldkongres van die Internasionale Federasie van Landboujoernaliste in Suid-Afrika by die maatskappy se hoofkantoor in Kaapstad deur mnr. Marius Ras (op die foto by die spuit), groepbemarkingsdirekteur, bekend gestel is. Die Rovic Leers Evenflow-toringspuit word grootliks in vrugteboorde gebruik. Die werktuig is by die hedendaagse vorms van vrugtebome aangepas. Dit gebruik Syncro-tegnologie wat verseker dat net die regte hoeveelheid chemikalieë teen die optimale windspoed toegedien word.
In ouer boorde is bome teen 230-250 bome per hektaar aangeplant en dit het baie groot geword. Konvensionele boordspuite moes gevolglik waaiers gebruik wat meer as 50 000 m3 lug per uur gebruik om die spuitstof toe te dien, wat dikwels meer as 3 000 liter per hektaar bedra.
Volgens moderne verbouingstegnieke word meer as 1 000 bome per hektaar gevestig en met snoeiwerk in toom gehou, terwyl net 500-750 liter spuitstof per hektaar nodig is.
Rovic Leers se nuwe werktuig is by hierdie toestande aangepas en dien spuitstof teen ’n baie laer windspoed toe. Die spuit verg slegs 7 kW om die spuitstof tot in die boonste boomtoppe toe te dien, wat ’n besparing van 40% in die boer se dieselrekening teenoor ’n konvensionele spuit moontlik maak. Die aanwending van die spuitstof is ook aansienlik doeltreffender.
PRYS: Die prys is ongeveer R320 000 vir ’n spuit met ’n tenk van 2 000 liter en ’n Evenflow-toring.