50 JAAR GELEDE
Uit: Die Landbouweekblad, 20 Junie 1967
BOERE BOU ’N WEESHUIS
Op ’n plaas in die omgewing van Kafferskraal, Wes-Transvaal, is ’n weeshuis wat seker die enigste in sy soort in die land is. Die bestuurskomitee bestaan net uit boere, want dit is immers boere wat die weeshuis opgerig het en dit in stand hou.
Die idee van ’n weeshuis op ’n plaas het ontstaan by mnr. T.J. Hugo, hoof van die plaasskool Saambou, waar die weeshuiskinders nou ook skoolgaan. Hy het gemeen ’n plaasweeshuis met sy landelike atmosfeer behoort vir ouerlose kinders voordeliger te wees as die onpersoonlike verblyf in die stede.
Die plan het goed byval by die boere in die omgewing gevind. Mnr. Heine Schulenburg, ’n beesboer van Kafferskraal, het ’n plaashuis as tydelike blyplek vir die kinders geskenk.
Op 6 April 1959 is die weeshuis geregistreer en in die eerste jaar het die boere self al die koste gedra. Die kinders het spoedig meer geword en die huis moes vergroot word — en weer het die boere die materiaal geskenk en die bouwerk gedoen.
In 1963 is ’n nuwe gebou opgerig op grond wat deur die bestuur vir dié doel aangekoop is. Vandag huisves die weeshuis, bekend as die Lushof-kinderhuis, 60 kinders, onder wie babas, uit alle dele van die land.
Die kinders word geleer om in die landbou belang te stel. Die seuns sien om na ’n mielieland en groentetuin en die meisies versorg die hoenders en blomtuin.