INVOERBEPERKINGS KNOU KOUVOËLTELERS
Die verbod op die internasionale handel van die Afrika-rooistertpapegaai (African Grey) het die afgelope jaar ’n beduidende demper op die plaaslike kouvoëlmark gehad. Dit volg ná die besluit van die konvensie oor internasionale handel in bedreigde spesies (Cites) op verlede jaar se COPS17-beraad om die beskermingsvlak van dié voëlsoort van bylaag 2 tot bylaag 1 te verander.
Suid-Afrika se sowat 100 000 broeivoëls van sowat 1 600 geregistreerde rooistertpapegaaitelers lewer jaarliks meer as 65 000 hokgeteelde kuikens in streng beheerde toestande. Die meeste daarvan is in die verlede in die Verre- en die Midde-Ooste verkoop. Sowat 5 000 hokgeteelde kuikens word jaarliks vir broeidoeleindes teruggehou.
Volgens mnr. Hennie Diederichs, ’n Vrystaatse boer wat in 2006 daarin geslaag het om rooi African Greys op sy plaas in die distrik Koppies te teel, beleef hy wisselende welslae met die verskillende papegaaisoorte in sy besit.
Die plaaslike verhandeling van vinksoorte verloop egter flink met die vraag wat die aanbod oorskry.
Dr. Jaco Gericke, voorsitter van die Rosestad-voëlklub in Bloemfontein, sê plaaslike telers gee hoofsaaklik aandag aan die mutasies van sebravinke en reënboogvinke (Erythrura gouldiae). In die algemeen hou telers Australiese, Suid-Amerikaanse en Afrikasoorte aan, maar daar is wel vinksoorte in Indië en Suidoos-Asië. Volgens Gericke het die swak wisselkoers vinke uit Europa betreklik onbekostigbaar gemaak.