BUFFELPRYSE VERRAS STEEDS

Pryse vir kleurvariante en skaars wild, soos swartwitpense en bastergemsbokke, het soveel verlangsaam as wat dit waarskynlik gaan doen, sê mnr. Brandon Leer, wildafslaer. Tog verras buffelpryse hom steeds, sê hy.

Leer sê diere met besonderse eienskappe behaal steeds goeie pryse op veilings, soos die njala met horings van 31 duim wat op die onlangse Classic Game Breeders-veiling by die Carousel naby Pretoria teen R500 000 verkoop is. ’n Koedoebul het R220 000 behaal en ’n gekruiste Zambiese swartwitpensbul R320 000. Dragtige buffelkoeie het gemiddeld R206 000 stuk behaal en ’n Oos-Afrikabul is teen R300 000 verkoop. Leer sê selfs dié pryse is aansienlik laer as wat kopers verlede jaar bereid was om te betaal. Hy wys daarop dat daar nou so baie wild op veilings aangebied word dat kopers nie sommer hand opsteek vir enigiets meer as ’n winskoop nie. “Die kopers se houding is dat daar volgende week nóg ’n veiling sal wees.”

Hy sê dit is nou ’n kopersmark en raai wildboere aan om hul balansstate teen die huidige wildpryse te laat klop pleks daarvan om veilings te kanselleer. “Kopers meen hulle moes uithaal en wys toe die pryse hoog was en verkopers was maar te bly om hul geld te vat. Noudat pryse laag is, meen kopers dieselfde telers wat geglimlag het toe dit ’n verkopersmark was, wil nie meer met hulle sake doen nie.”