Boere ‘moet altyd die ergste verwag’

BOERE moet altyd die ergste dinge verwag, want as hulle nie in hul pasoppens is nie, kan dit die einde van die boerdery beteken, het dr. Roger Cady, hoof van volhoubaarheid van die Amerikaanse suiwelmaatskappy Elanco, op die tiende SA grootkuddekonferensie by die Champagne Sport-oord in die KwaZulu-Natalse Drakensberg gesê.

Sy openingslesing het aangesluit by die tema van die konferensie, Volharding in die suiwelbedryf. Hy het gesê volharding is ’n noodsaaklike deel van volhoubaarheid. Bedreigings vir ’n melkplaas is talryk en sluit ekonomiese, menslike, sosiale en politieke faktore, verlies aan hulpbronne, die weer en klimaat, asook siektes en plae in.

“Enigeen van hierdie bedreigings kan ’n einde aan die boerdery of besigheid bring as dit nie te alle tye te wagte is en verstaan word nie,” het Cady gesê.

Daarom moet die boer of bestuurder ag slaan op vyf oorkoepelende beginsels as hy of sy ’n bestuurder met volharding wil wees: Verwag dat die ergste kan gebeur; stel ’n plan op en stel dit in werking; beheer wat beheerbaar is en vergeet van die res; gee aandag aan sake wat die belangrikste is wanneer dit aandag verg; en reik altyd na die onmoontlike droom.