Eenspoedfiets vir sterker spiere
As jy hoor van kragoefeninge wat van jou ’n beter fietsryer kan maak, dink jy ook aan gewigte, maag- en rugoefeninge? Daar is darem opwindender maniere om sterk te word.
Twee planne om van jou ’n sterker fietsryer te maak, is om vir jou ’n enkelspoedfiets aan te skaf of te leer hoe om groter ratte te hanteer – of dit nou opdraand of afdraand is. Die enkelspoedfiets is gewoonlik ’n padfiets wat van enige materiaal gemaak is, maar tradisioneel van allooi. Dit het net een rat en die keuse van ’n baan-agterwiel sonder remme (as jy dus ophou trap, draai die pedale steeds). Daar is ook die opsie om op te hou trap sonder dat die pedale aanhou draai, soos met ’n gewone padfiets.
Dit verg nogal toewyding om gewoond te raak aan die eerste opsie, veral omdat jy met beenkrag jou remwerk moet doen – wat baie meer krag verg as ’n gewone vrywielfiets en jou beenspiere op ’n ander manier laat werk.
BULT OP, BULT AF
Die fiets het natuurlik ook net een rat, daarom dwing dit die ryer om uit die saal te kom wanneer steiler bulte aangepak word. Dit bou nie net krag nie, maar ook geduld om nie teen die rat te veg nie. Teen afdraandes vereis dit weer soepelheid van die ryer. Dit leer ’n mens ook geduld, net soos om teen die wind van voor te ry en nie te hard te druk nie, maar ’n goeie, verantwoordelike pas vol te hou. (Net ’n wenk: Dis dalk makliker en minder gevaarlik om dié speletjie aan te durf met ’n enkelspoedfiets waarvan die pedale ophou draai as jy nie trap nie.)
’n Goeie idee is om ’n fiets te koop met ’n “flip flop”-agterwiel. Aan die een kant het dit ’n vrye wiel, maar dit kan omgedraai word vir ’n vaste wiel aan die ander kant. Dit sal jou met remme leer ry en, namate jy gemakliker voel, kan jy oorslaan na die vaste rat wat die remwerk aan jou bene oorlaat – wat ook die meeste oefening en toewyding verg. Dis ’n moeilike manier van oefen, maar beslis uitdagend en interessant.
GOEDKOOP EENVOUD
Die beste aspek van eenspoedfietse is hul eenvoud, sakpas pryse n lae instandhoudingskoste. Vir’ n goeie een behoort jy sowat R7 000 op te dok.
Enkelspoedfietse kan toegerus word met bulhoring-handvatsels, cyclocross-remme wat in die middel van die handvatsels sit, gewone padhandvatsels of reguit handvatsels.
Maak jou maar reg, aanvanklik sal ’n enkelspoedfiets baie frustrerend wees, maar as jy eers gewoond is daaraan, is dit ’n baie opwindender manier om krag te bou as om vervelige oefeninge in die gimnasium te doen. Jy kan sterker word sonder om van jou fiets af te klim. En met jou nuutgevonde krag gaan jy die groep fietsryers in die toekoms makliker afskud.
Gideon van Oudtshoorn is’ n bergfiets geesdriftige, persoonlike fiksheidsinstrukteur en vryskut-motorfiets rubriekskrywer. Hy het vanjaar weer die Absa Cape Epic voltooi. Hy is ook die eienaar van GVO Bicycles, wat berg-, pad- en veldfietse invoer en versprei.