Skaap nou ook op Safex
DIE Johannesburgse beurs bied skaapboere nou ook die opsie om hulself teen prys-wisselvalligheid te verskans, en dalk selfs groter toegang tot finansiering te bekom.
Die JSE het pas ’n termynkontrak vir Merinowol bekend gestel, kort op die hakke van ’n kontrak vir lamkarkasse, wat die pryse van A2- en A3-grade lam navolg.
Die nuwe wolkontrak se pryse sal deur die Merino-aanwyser bepaal word, ’n indeks wat die bedryfsorganisasie Cape Wools SA ontwikkel het, sê die JSE in ’n verklaring.
Hierdie indeks is ’n aanduiding van bewegings in die wolprys, en word bereken deur ’n geweegde gemiddelde prys van ’n spesifieke wolveiling met dié van ’n vorige veiling te vergelyk.
Die veilings word in die wolproduksie-seisoen weekliks in Port Elizabeth gehou.
Mnr. Chris Sturgess, direkteur van afgeleide kommoditeite op die JSE, sê Cape Wools het die beurs aanvanklik oor die moontlikheid van ’n wol-termynkontrak genader.
“Die Suid-Afrikaanse wolbedryf staan op die rand van ’n buitengewone groeifase, en die JSE is bevoorreg om die geleentheid te hê om die bedryf te help om sy potensiaal te verwesenlik.”
Mnr. Louis de Beer, uitvoerende hoof van Cape Wools, sê die vraag na wol is uitstekend omdat internasionale wolproduksie op ’n geskiedkundige laagtepunt is.
“Die bedryf is optimisties oor die geleentheid om wolproduksie te verhoog. Die nuwe kontrak sal boere ’n meganisme bied om hul prysrisiko te verlaag.”
Hy sê Suid-Afrika het vanjaar 52,5 miljoen kg wol gelewer, maar daar is markruimte om dit met 22,5 miljoen kg op te stoot.
Kopers en verwerkers sal ook by die nuwe kontrak baat kan vind, sê De Beer.
Hy meen die termynkontrak kan belanghebbendes help om bykomende finansiering te bekom, deurdat dit as sekuriteit kan dien.
Hy wys daarop dat daaglikse bewegings in die wolprys deur verskeie faktore beïnvloed word. Dit sluit in die wisselkoers, die vraag na wol uit Australië en Suid-Afrika, bestellings van verskillende kopers, en die gehalte van wol wat aangebied word.
Bykans die hele Suid-Afrikaanse wolskeersel word teen sowat R4,5 miljard per jaar uitgevoer. Die wol word deur 4 500-9 000 kommersiële wolboere, en 30 000-50 000 kommunale boere gelewer.
Die nuwe termynkontrak verteenwoordig 1 000 kg skoon, geweegde wol, en is vir vier verskansingsmaande beskikbaar – Maart, Junie, September en Desember.