HOENDERBEDRYF MÓÉT BEMAGTIG
DIE REGERING sal die pluimveebedryf deur invoertariewe bly beskerm, maar die bedryf moet ook sy kant bring.
Die bedryf moet aandag gee aan mededingendheid en tegnologie, maar ook aan die “onaanvaarbaar lae vlakke” van swart ekonomiese bemagting (SEB).
“SEB is nie ’n luukse nie. Dit is ’n werklikheid waaraan ons nie kan ontsnap nie.” Só het mnr. Garth Strachan
(foto), adjunkdirekteur-generaal van die Departement van Handel en Nywerheid, op vanjaar se AVI Afr i c a-pluimvee konferensie in Kempton Park gesê.
Strachan is voorsitter van die Regering en die pluimveebedryf se taakspan wat aan oplossings vir die krisis in die bedryf werk.
Die oplossings moet volgens hom gesamentlik gevind word. Ongunstige kommentaar deur leiers in die bedryf, soos dat die Regering eers wakker geskrik het toe mense hul werk verloor het, is onwaar en help nie die proses nie.
Strachan sê die taakspan het homself tot nou eers deeglik vergewis van die stand van verskillende kwessies in die bedryf.
Die slotsom waartoe gekom is, is dat die bedryf in die meeste dele van die waardeketting mededingend is, maar nie in alles nie, byvoorbeeld nie wat meganies ontbeende vleis betref nie.
Verder aanvaar die Regering dat daar verwringings op die globale mark is wat verband hou met verbruikers voorkeure en subsidies in ander lande.
Die taakspan het volgens Strachan nou ’n goeie begrip van die mate waarin ander lande hul verbruikers, maar ook hul bedrywe, deur sanitêre en fitosanitêre maatreëls beskerm.
TARIEWE
Beskermende tariewe teen invoer kan egter nie sommer oornag ingestel word nie.
Strachan benadruk die onafhanklikheid van die Kommissie vir Internasionale Handel s administrasie, en dat Suid-Afrika die Wêreldhandelsorganisasie se reëls en handelsooreenkomste moet eerbiedig.
KOOP PLAASLIK
Strachan sê as deel van die Regering se ondersteuning aan die bedryf, het die Tesourie sowat drie weke gelede opdrag gegee dat staatsinstellings slegs plaaslike hoender mag koop.
‘SEB is nie ’n luukse nie. Dit is ’n werklikheid waarvan ons nie kan ontsnap nie.’