EU GEE KOP MET 0,1%
DIE EUROPESE UNIE (EU) het onlangs ’n “reusesprong” oor geneties gemodifiseerde (GM) gewasse gemaak.
Produkte met GM-tegnologie wat deur die EU goedgekeur is, is in ’n register aangeteken en mag ingevoer word.
Die streek het nou egter beweeg van zero-verdraagsaamheid teen die voorkoms van ongoedgekeurde GM produkte in ingevoerde voedsel en veevoer tot ’n skrale 0,1%.
“Dit is steeds ’n handelsversperring,” het dr. Wynand van der W alt, Suid-Afrikaanse biotegnologie kenner, by die landbou biotegnologie bedryf( AB I) se jaarlikse mediakonferensie oor die stand van GM oeste wêreldwyd gesê.
Van der Walt het gesê die verandering is ’n reusesprong vir die EU, maar ’n baie klein verandering vir lande waar GM gewasse vir aanplanting goedgekeur is.
Volgens hom is dit duur om graan vir sulke lae vlakke van GM produkte te toets.
Hoewel handel nou tegnies makliker behoort te wees, is dit vir Suid-Afrika in die praktyk steeds ’n probleem.
Van der Walt verwag nie dat die EU verdere veranderinge gaan maak of dat die internasionale handelsituasie beduidend gaan verander nie.
GESUKKEL MET SOJA
Mnr. Andrew Bennett, bestuurder van tegnologie-ontwikkeling by Monsanto en voorsitter van die ABI se reëlingskomitee, het gesê voor Roemenië deel geword het van die EU, was Roundup Ready-sojabone daar goedgekeur. Dié land was toe ’n sojaboon-uitvoerland.
Toe hy deel geword het van die EU, kon daardie saad nie meer geplant word nie.
“Roemenië het toe weer ’n sojaboon-invoerland geword en voer nou GM sojabone uit Brasilië in. Dit is hoegenaamd nie logies nie. Dit is tot sy boere se nadeel. In baie lande verteenwoordig boere minder as 5% van die bevolking.”
Die oppervlak onder GM mielies in Europa het van 2015 tot verlede jaar met 17% gegroei.
Spanje is steeds die land met die grootste oppervlak onder GM gewasse, naamlik 129 081 ha onder mielies verlede jaar.
In Portugal was daar 7 069 ha, in Slowakye 138 ha en in die Tsjeggiese Republiek 75 ha onder GM gewasse.
‘In baie lande verteenwoordig boere minder as 5% van die bevolking.’