‘LAAT BEWEI VELD VIR VINNIGER HERSTEL NÁ BRAND’
’n Veertien jaar lange studie in Amerika het gewys dat beweide veld ná ’n brand vinniger as onbeweide veld herstel.
Beweide veld is ook minder geneig om deur indringergras ingeneem te word, het drr. Kirk Davies, Tony Svejcar en Jon Bates van die Amerikaanse departement van landbou se landbounavorsing s diens bewys.
Hulle het die navorsing in 1993 in die suide van die deelstaat Oregon begin om die invloed van beweiding op die verspreiding van die indringergras Bromus tectorum (daar bekend as cheatgrass) begin. Dit is ook in Suid-Afrika ’n indringer en staan hier bekend as brome.
Die navorsing was in ’n tyd toe die aktiviste-organisasie Earth First ’n baie aktiewe veldtog teen beesboerdery gevoer het. Die aanname is gemaak dat lewende hawe die verspreiding van indringergrasse bevorder en habitat van natuurlewe ontneem.
Die drie weidingkundiges het vier kampe op die Northern Great Basin-proefplaas aan vier verskillende behandelings onderwerp: Die eerste was onbewei en nie gebrand nie, die tweede onbewei en gebrand, die derde bewei en nie gebrand nie, en die vierde bewei en gebrand.
Nou het hulle op grond van die veertien jaar se data bevind dat matige beweiding van veld met vee die inheemse plante se vermoë om ná ’n brand te herstel, verbeter. Dít verhoed op sy beurt weer groter indringing deur Bromus tectorum.
“Hoewel vee nie deel van die historiese prentjie van vuur en brand in die Weste was nie, kan beweiding wel nou nodig wees om die nuwe druk deur indringerplante en klimaatsverandering te verlig,” sê die navorsers in hul gevolgtrekking.