KONFERENSIE OOR BEWARING AMPER HIER
BEWARINGSLANDBOU WESKAAP (BLWK) se jaarlikse Jack Human-bewaringslandbouweek word vroeg in Augustus in die Boland gehou.
Die konferensiedag vind op 1 Augustus op Elsenburg plaas, terwyl die praktiese dag op 3 Augustus by die Hoër Landbouskool Boland gehou word.
Drie buitelandse en Suid-Afrikaanse sprekers het reeds bevestig dat hulle die BLWK-konferensie sal toespreek.
Dr. Ken Flower van die Universiteit van Wes-Australië in Perth is geen onbekende by Kaapse bewaringsboere nie.
Hy gaan oor sy ondervinding met en navorsing oor verminderde en geenbewerking praat.
Nog ’n kundige wat nie heeltemal onbekend by Kaapse boere is nie, is dr. Wendi Taheri, eienaar van die Amerikaanse maatskappy TerraNimbus. TerraNimbus doen navorsing oor die beste maniere om te bepaal of daar arbuskulêre mikorisaswamme in grond is.
Sy gaan op die konferensiedag oor mikorisa (swamme wat met wortels geassosieer is) praat en op die praktiese dag meer sê oor diversiteit onder die grond.
Die derde kundige op die konferensie is dr. Ronel Hendriks, hoof- wetenskaplike beampte van ABM Africa, waar sy die veldtoetse vir die registrasie van produkte doen.
Sy gaan boere toespreek oor die belang van die swam Trichoderma by die produksie van graangewasse.
PRAKTIESE DAG
Proewe wat op die praktiese dag op 3 Augustus by die Hoër Landbouskool Boland bekyk en bespreek kan word, sluit die volgende in: Kanola wat teen saaidigthede van 1 kg/ha, 3 kg/ha en 5 kg/ ha met tand- en skyfplanters geplant is. ’n Diversiteitsproef met dekgewasse wat een grasgewas, een peulgewas, drie gewasse en ’n veelvoudige mengsel met meer as tien gewasse insluit. Invoorbehandelingsproef met koring. Stikstof by die pit in koring en kanola met tand- en skyfplanters. Organiese kunsmis by koring en kanola.