Demonstrasies lok duisende boere
Die alombekende Valboeredag is een van die gewildste landbouskoue onder boere danksy die werktuigdemonstrasies. Dit is eersdaags weer tyd vir dié opwindende skou in Mpumalanga.
Duisende mense woon jaarliks die Val-boeredag by om op die hoogte van die nuutste landboutegnologie te bly. Vanjaar word dié boeredag van die Waterval-boerevereniging op 5 Julie by Val tussen Greylingstad en Standerton in Mpumalanga gehou.
Werktuie te kies en te keur sal oudergewoonte ingespan word om talle demonstrasies aan te bied.
Die belangrikheid van die dag rus heeltemal op die demonstrasies van ’n groot verskeidenheid werktuie, trekkers, stropers, spuite en die verskillende bewerkingsmetodes wat toegepas kan word. Dit sluit in konvensioneel, geenbewerking, strookbewerking, minimum grondbewerking en beheerde verkeer.
JOHN DEERE
“Die Val-boeredag lê ons baie na aan die hart en AFGRI, saam met John Deere, is al lank by dié dag en die gemeenskap betrokke. Dit is werklik een van die min bona fide-demonstrasiedae wat op hierdie skaal in Suid-Afrika bestaan,” sê mnr. Etienne Meyer, bemarkingsbestuurder by AFGRI Equipment.
Die grondtoestande in Val is moeilik omdat die turfgrond ’n hoë klei-inhoud het. Hierdie tyd van die jaar raak die grond baie hard en gewoonlik is daar baie oesreste.
“Besoekers kry só ’n goeie idee van hoe ’n sekere werktuig sal vaar in hul toekomstige uitbreidings of op hul gevestigde plase. Wat lekker is, is dat klante met vrae daaroor sommer op die skou met ons kenners daaroor kan gesels en onmiddellike terugvoering kry,” sê Etienne.
MONSANTO
Mnr. Louis Bibbey, Monsanto se verteenwoordiger in die Val-omgewing, sê hulle is vanjaar weer een van die hoofborge.
“Boere is elke jaar baie tevrede met hoe die dag verloop en met wat aangebied word,” sê hy. “Die demonstrasies speel beslis ’n rol in die sukses. Die werktuie wat vir die demonstrasies gebruik word, is relevant en ’n groot hoeveelheid maatskappye is verteenwoordig.”
Die Val-boeredag word van onder meer die Nampo-Oesdag onderskei deur die
demonstrasies. Die meeste besoekers is boere en dit is dus vir maatskappye die moeite werd om ’n borg te wees.
“Hier kan ons op ’n doeltreffender wyse met ons teikenmark in aanraking kom,” sê Louis.
LEMKEN
Mnr. Karel Munnik, besturende direkteur van Lemken Suid-Afrika, sê hulle is al sedert 2012 by die Val-boeredag betrokke.
“Dit is vir ons belangrik om deel te wees van een van die grootste demonstrasiedae in Suid-Afrika. Ons kry goeie blootstelling danksy die groot aantal besoekers. Dit is moeilik om Lemken-toerusting van ’n brosjure af te verkoop. Die Val-boeredag se demonstrasies bied daarom ’n uitstekende platform om die werktuie in aksie te sien,” sê hy.
AANWYSINGS
Val is tussen Greylingstad en Standerton (sowat 45 km van Standerton af). Ry met die R23, draai af op die R547 en ry sowat 7 km na Val. Die boeredag word op ’n terrein langs die Val-hotel gehou.