Inligtingsnetwerk kan elke bewoner op plase beveilig
Inligting tot die beskikking van die boer én sy plaaswerkers kan gebruik word om plaasaanvalle te voorkom of die boosdoeners ná ’n aanval vas te trek.
Met soveel boere wat by gebiedsbeveiligingsnetwerke en plaaswagte inskakel, asook tegnologie, heinings, diefwering en alarms gebruik as buffers teen moontlike boosdoeners, moet plaasaanvallers selfs verder gaan om ’n kwesbare teiken te identifiseer.
Kennis is mag, lui die gesegde, en dit is veral van toepassing op die beskerming van plaasinwoners. Die bestuur van ’n inligtingsnetwerk op jou plaas is ’n belangrike deel van doeltreffende veiligheid – dit geld die inligting wat die boer tot sy beskikking het, asook die inligting oor die boer en sy bedrywighede waartoe ander toegang het. In die verkeerde hande kan sekere inligting beteken dat volledige en andersins doeltreffende veiligheidsmaatreëls nutteloos word omdat ’n boosdoener inligting bekom het om dié maatreëls te omseil.
Twee vrae is hier van toepassing: Wat weet ander mense van jou doen en late wat in ’n aanval teen jou gebruik kan word? En wat weet jy van ander se doen en late wat jou teen ’n aanval kan beskerm?
Die belangrike rol van plaaswerkers in ’n goeie inligtingsnetwerk kan eenvoudig nie onderskat word nie. Werkers het toegang tot inligting wat ’n boer eenvoudig nooit sal kan kry nie. Hulle is egter ook in talle gevalle die teikens van plaasaanvallers, wat hulle nader om inligting onder valse voorwendsels uit hulle te kry.
In party gevalle is dit ongelukkig ook die plaaswerkers self wat die aanval beplan en uitvoer. Dus is die versigtige bestuur van inligting van die uiterste belang.
LEI WERKERS OP
Werkers moet deeglik opgelei word oor veiligheidsbedreigings op die plaas. Kweek ’n bewustheid onder werkers dat hulle self die slagoffers van aanvalle kan wees en dit dus in hul beste belang is om saam met die boer te werk om die plaas en sy inwoners veilig te hou.
Die werklikheid is dat plase soms ná plaasaanvalle in onbruik verval, of deur bure gekoop word wat nie die werkers behou nie. Dus kan die impak van ’n aanval beteken dat alle inwoners sonder ’n inkomste sit.
Sekerlik die belangrikste aspek van inligtingsbestuur is dat enigeen wat uitvra oor ’n boer se huis, roetine, gewoontes en veiligheidsmaatreëls met groot agterdog bejeën moet word. Werkers moet opgelei word om sulke navrae te weier én om dit by die boer aan te meld. Sodoende kan ’n boer voor ’n aanval bewus word van ’n bedreiging. Vra jouself af of jou werkers jou sal inlig indien so iets gebeur. Indien nie, is dit ’n gevaarlike situasie wat reggestel moet word. Werkers moet ook bewus wees daarvan dat ander hul goedhartigheid en vriendskap kan misbruik om inligting te bekom.
TOEGANGSBEHEER
Streng beheer moet toegepas word oor wie wanneer op die plaas kan kom, en in watter omstandighede. Aanvallers kan maklik voorgee dat hulle kom werk soek, terwyl hulle eintlik na swak plekke in jou veiligheidsmaatreëls of gewoontes kom soek.
Indien jy nuwe werkers in diens neem, is dit wenslik om dié raad te volg: Moet nooit ’n onwettige immigrant in diens neem nie. Sluit ’n wetlik gepaste dienskontrak met jou werkers. Neem slegs mense in diens wat ’n geldige identiteitsdokument het. Neem ’n foto van goeie gehalte van elke werker, waarvolgens hulle maklik geïdentifiseer kan word. Dring aan op verwysings en kontak voormalige werkgewers. Moet in geen omstandighede iemand aanstel wie se agtergrond jy nie kan naspeur nie.
Maak afskrifte van die werknemer en sy eggenoot se identiteitsdokumente. Kry ook sy afhanklikes se inligting. Vra sy huisadres as hy elders bly. Maak ’n afskrif van sy rybewys. Neem waar moontlik vingerafdrukke en gaan misdaadrekords na, is die raad van dr. Jane Buys van Vrystaat Landbou se veiligheidskomitee. Dit is immers deesdae standaardpraktyk by talle groter maatskappye en is ’n ál toegankliker opsie.
“Die enigste manier om seker te wees ’n persoon is wie hy sê hy is, is om vingerafdrukke te bekom (wat deur ’n kontrak uitstippel dat hy toestemming verleen) wat dan deur polisiekanale vir misdaadrekords deurgestuur word,” sê Jane.
“Daar is heelwat mense wat voorgee hulle is iemand anders, daar is heelwat gewoonte-misdadigers en selfs mense wat weens ernstige misdade uit is op parool en dan op plase of kleinhoewes aanklop op soek na werk.”
Hou in gedagte dat jou werkers moontlik by ’n aanval op ’n ander plaas betrokke kan wees. Dus is dit verantwoordelike buurmanskap om soveel moontlik naspeurbare inligting oor jou werkers beskikbaar te hê.
Werkers behoort waar moontlik gereelde werksure te hê sodat bewegings op die plaas op sekere tye, veral saans, beperk kan word.
DIE GEVAAR VAN ROETINE
Gaan jy elke Sondag na dieselfde diens by die kerk? Betaal jy jou werkers met kontant, altyd op Vrydae of bring jy die kinders dieselfde tyd elke dag of week van die skool af plaas toe? Dié gewoontes is gevaarlik indien ’n booswig daarvan bewus is.
Plaasaanvallers wag telkens niksvermoedende boere en hul gesinne op die plaas in ná sulke aktiwiteite. Dit is vir baie mense moeilik om roetines te verander. Probeer egter wél om dit te verander, veral as jy bewus raak van die moontlikheid van ’n aanval.
“Dit is algemeen bekend dat misdadigers wat op plaasaanvalle konsentreer vir ’n afsienbare tyd plase en hul eienaars dophou om die boer se roetine te bepaal. As ’n boer dus poog om daagliks van sy roetine af te wyk, sal dit aanvallers van stryk bring oor wanneer die gunstiger tyd sou wees om toe te slaan.
“Dit kan ook die geleentheid bied vir werkers, bewoners, bure en mense wat in die omgewing rondbeweeg om moontlik die aanvallers tydig raak te sien en te identifiseer as verdagte mense of voertuie wat in die omgewing rondbeweeg,” sê Jane.
Moet nooit geld op die plaas aanhou nie en maak seker dat jou werkers dit weet. Indien een geld kom vra, sê dat jy vooraf kennis nodig het omdat jy nie geld in die huis aanhou nie. Probeer om nie werkers met kontant te betaal nie, aangesien dit beteken dat jy dit kan vermy om groot bedrae kontant by jou te hou.
VERTROU, MAAR . . .
Terwyl vertroue tussen jou en jou werkers belangrik i sen die beste beveiliging stel seleen is wat alle partye beveilig, moet jy wysheid aan die dag lê oor watter werkers jy vertrou – én met watter inligting. Indien moontlik, is dit veel beter om nie met iemand te werk wat jy nie vertrou nie of met wie jy ’n slegte verhouding het.
Aanvaar verantwoordelikheid vir jou aandeel in jou verhouding me tjou werkers en doen moeite om werkers regverdig te behandel; só is jy eenvoudig veiliger as iemand wat gereelde konflik met werkers het.
“Een van die kernaspekte binne die landelike beveiligingsplan is die aanhoudende klem op die opbou van verhoudings tussen boere, die polisie, werkers en ander belanghebbendes. Dit is dus van die uiterste belang dat boere’ n goeie verhouding met hul werkers sal hê, dat werkers toenemend oplei- ding sal ontvang oor gebeurlikheid s planne wanneer ’n aanval plaasvind en dat werkers besef dat hulle ook moontlike teikens kan raak in aanvalle,” sê Jane.
“Dit is belangrik dat ’n boer se indiensnemingskontrak met sy werkers en selfs bewoners op plase goed geskryf en uiteengesit is sodat albei partye volledig saamstem oor hul pligte en verantwoordelikhede. Daar moet ook meganismes gereed wees om dispute tussen die boer en werkers intern te beredder.”
Indien jy wél in’ n situasie i swaar arbeid skonflik ontstaan, lig jou gebied beveiliging s netwerke n plaaswag i noor die konflik en die betrokke werker. Dié inligting kan nuttig wees in die voorkoming van ’n aanval, sowel as vervolging van die persoon wat betrokke is by ’n plaasaanval. Veiligheid moet ook in só ’n geval drasties opgeskerp word. Wees bedag op ’n skielike verandering in werkers se gesindheid – dit kan beteken dat intimidasie of opstokery aan die gang is.
Wees versigtig om jou persoonlike sake voor plaaswerkers of vreemdelinge te bespreek, veral gesprekke oor geld, wapens of jou en jou gesin se bewegings.
Identifiseer die werkers wat jy bo alle twyfel vertrou en gebruik hulle as informante – jy sal verbaas wees oor die inligting wat hulle soms het. Loof goeie belonings uit vir diegene wat inligting verskaf wat help om plaasaanvalle te voorkom of misdadigers vas te trek.
Met soveel plaaswerkers wat ook slagoffers van plaasaanvalle is, is die kans op oorlewing van jou én jou werker soveel beter indien julle saamwerk om mekaar te beskerm.