Betroubare vennoot vir elke boer
Die beste manier om ’n hedendaagse boer te beskryf, is om te sê hy is ’n finale besluitnemer. Hy moet gereeld besluite neem gegrond op verskeie faktore buite sy beheer. AFGRI Landboudienste is verbind tot ’n vennootskap met die boer en om hom by te staan
Die Val-boeredag is een van die grootste boeredae in Suid-Afrika en beslis die grootste raakvatdag ten opsigte van werktuigdemonstrasies, sê mnr. Tinus Prinsloo, hoof- uitvoerende beampte van AFGRI Landboudienste.
AFGRI is weer die trotse hoofborg van dié boeredag.
Dié boeredag is vir AFGRI belangrik omdat dit insiggewend is vir boere om nuwe tegnologie eerstehands te ervaar en die vermoëns van die werktuie te kan waarneem en beoordeel. Op die boeredag kan boere tegnologie in aksie sien en saam met ander boere kuier en gesels, sê Tinus.
“Dit is vir ons belangrik dat boere die tegnologie en werktuie in werking sien. Só kan hulle bepaal of die nuwe tegnologie tot die vooruitgang en volhoubaarheid van hul boerdery kan bydra. Dit gee hulle die kans om met sekerheid die regte besluite te neem ten opsigte van die finansiële belegging in presisiemeganisasie op die plaas.”
Ongeveer 3 000 boere het verlede jaar se boeredag bygewoon en AFGRI sien uit daarna om vanjaar weer met die Val-boerevereniging hande te vat en ’n suksesvolle boeredag aan te bied.
“AFGRI wil die nodige ondersteuning aan landbougemeenskappe bied om volhoubaarheid in die landbou te verseker,” sê Tinus. “Dankie aan die Waterval-boerevereniging vir die geleentheid om weer die hoofborg te kan wees.”
HANDELSAANBOD
AFGRI Landboudienste bied holistiese en relevante oplossings aan kliënte wat by die graanwaardeketting betrokke is. Die oplossings is almal pasgemaak op grond van ’n diepgaande begrip van die landbou- en graanwaardeketting, van saad tot by finansiering en produksie, opberging, bemarking en alles tussenin. AFGRI is trots op die oplossings wat hy bied.
Hinterland is in 2013 gestig, met sy hoofkantoor in Klerksdorp. Dit verteenwoordig die samesmelting van twee landboureuse in Suid-Afrika, naamlik AFGRI en Senwes.
Landbouprodusente en ander kliënte word bedien deur die handelstakke AFGRI Town & Country, AFGRI FarmCity en
Senwes Village. Gevestigde infrastruktuur, direkte bemarkers, kundigheid en ’n omvattende reeks produkte en dienste bied verdere ondersteuning.
Hinterland is geografies so goed geleë dat dit die grootste deel van Suid-Afrika se somergraanproduksiestreek bedien met 49 handelstakke en ’n teenwoordigheid in Gauteng, KwaZulu-Natal, Mpumalanga, die Noord-Kaap en die Vrystaat.
UNIGRO
UNIGRO, finansierings-en-versekeringsafdeling van AFGRI, is trots daarop dat hy landwyd die voorste verskaffer van pasgemaakte landboufinansiering vir die kommersiële boer is. As ’n landbouspeler verstaan UNIGRO boerdery en die boer se finansiële vereistes. Hy het begrip vir versekeringsvereistes wat uniek is tot die boer se spesifieke behoeftes – van korttermynversekering tot gewasbeskerming, wildversekering, welvaartbestuur en ’n siekefonds.
UNIGRO het ’n stappie vorentoe geneem en eAccounts van stapel gestuur. Die visie is om aan kliënte ’n omvattende, doeltreffende elektroniese platform te bied om hul werk maklik deur middel van ’n rekenaar, slimfoon of tablet te bestuur.
Die elektroniese eAccounts-platform bied aan kliënte transaksies en aanlyntoegang tot relevante rekeninginligting, soos gedetailleerde verslae en inligting oor hul graanlewering vir opberging by enige van AFGRI Grain Management se persele, sowel as intydse rekeningbetalings. Betalings van meer as R4 miljard is die afgelope twee jaar deur eAccounts gemaak. Die grootste transaksie was een van R63 miljoen.
Die funksionaliteit wat kliënte in staat stel om gedetailleerde rekeninge te sien, is baie gewild, sowel as die funksionaliteit om begunstigdes by te voeg of te betaal sonder om ’n tak te besoek of die hoofkantoor te bel. Nog ’n voordeel is die tyd wat boere spaar omdat intydse transaksies hulle in staat stel om dadelik op markbewegings te reageer. Dit help boere ook met verskeie aspekte van boerdery-administrasie – gerieflik op een platform.
AFGRI het ’n aansienlike bedrag belê om ’n veilige aanlynomgewing te skep in pas met die elektroniese dienste wat deur banke gebied word. Eksterne sekerheidstoetse word gereeld gedoen om te verseker dat die sekerheidsmaatreëls byhou met die nuutste tegnologiese vordering.
IS JY GROEN?
AFGRI Equipment, deel van AFGRI Landboudienste, is die grootste John Deere-agentskap buite Noord-Amerika en ’n internasionale verskaffer van gemeganiseerde toerusting. Die maatskappy bied die wêreld se voorste toerustinghandelsname, gerugsteun deur ’n onderneming so goed soos die produkte wat dit verkoop.
Deur ’n netwerk van 40 strategies geleë toerustingtakke verskaf AFGRI Equipment trekkers, stropers, planters, balers, spuite, snyers, strooiers, skrapers, laaigrawe, paal-gatgrawers en presisielandboutoerusting met GPS-stelsels.
Moderne werkwinkels is toegerus met die beste gereedskap en vaardighede om staantyd te verminder. ’n Vloot mobiele diensvoertuie is ook beskikbaar. Die maatskappy doen sake in Suid-Afrika, Zimbabwe, Zambië, Botswana, Ghana en Wes-Australië.
AFGRI Equipment het vir die tweede agtereenvolgende jaar die eerbewys as beste kommersiële handelaar in Suid-Afrika ontvang met die gesogte Absa Golden Partner-eerbewyse.
GRAANBESTUUR
AFGRI Grain Management bied die veilige opberging van landbou- en ander produkte in Suid-Afrika, Zambië, die Republiek van die Kongo, Mosambiek, Uganda, Tanzanië en Zimbabwe. Infrastruktuur in Suid-Afrika bestaan uit 69 graansilo’s en 14 bunkers landwyd. Graan word afsonderlik volgens gehalte en graad gehanteer en opgeberg.
AFGRI Grain Management het ’n opbergingsvermoë van meer as 5 miljoen ton in silo’s, pakhuise, bunkers, graandamme en silosakke.
ONTWIKKELING EN OPLEIDING
Deur Harvest Time Investments is die nuwe opleiding-en-ontwikkelingsprogram vir boerdery aan die mark bekend gestel – met groot sukses. Met meer as 90 jaar ervaring van die landboubedryf verstaan AFGRI wat dit beteken om ’n suksesvolle boer te wees en hoe om die potensiaal van boere en hul plase te ontsluit deur opleiding, ontwikkeling en toegang tot finansiering en markte.
As deel van die inisiatief gebruik AFGRI studiegroepe en proefterreine om nuwe tegnologie, soos presisieboerdery, te demonstreer. Mentors en landboukundiges staan reg om praktiese inligting en kennis oor te dra en bied insig uit baie jare se ervaring.
AFGRI Landboudienste glo die reis na landbousukses begin met ’n betroubare vennoot.