Val-boeredag floreer ná 22 jaar
Die Val-boeredag het in 1995 met slegs agt uitstallers begin. Vanjaar, 22 jaar later, is meer as honderd uitstallers betrokke en duisende besoekers stroom deur die hekke.
Die eerste Val-boeredag is in September 1995 op mnr. Rodney Reynolds se plaas Oudehoutspruit naby Standerton, Mpumalanga, gehou. Van ’n beskeie begin met slegs agt uitstallers het dit gegroei tot 118 uitstallers verlede jaar, met meer as 3 280 besoekers. Vanjaar is die 22ste aanbieding van dié gewilde geleentheid op die landboukalender.
Die Val-boeredag is ’n suksesverhaal gegrond op samewerking, harde werk en ’n poging om weer demonstrasies soos van ouds aan die landbougemeenskap te bring.
KLEIN BEGIN
’n Boer van die omgewing, mnr. Dick Kerslake, het die idee gekry om ’n boeredag by Val te hou sodat die nuutste plaastoerusting gedemonstreer kon word. Hy het gemeen dit is belangrik dat boere moet kan sien hoe die toerusting werk in toestande soortgelyk aan dié op hul eie plase. Nog ’n voordeel was om die verskillende produkte met mekaar te kan vergelyk.
Dick en lede van die Waterval-boerevereniging het met verskeie landbou-ondernemings in die omgewing vergader om die idee te bespreek. Met die steun van dié maatskappye en plaaslike boere kon die Val-boeredag toe ’n werklikheid raak.
Aan die begin was OTK (nou AFGRI) daar in die vorm van John Deere. Toerusting en werktuie van Rovic Leers, GC Tillage, Northmec se Case-trekkers, Radium Engineering en Ritchieplaastoerusting, wat New Holland-toerusting uitgestal het, en Challenger-trekkers, is gedemonstreer.
Die eerste Val-boeredag was ’n groot sukses.
UITBREIDING
Met die tweede Val-boeredag is stropers ook by die demonstrasies ingesluit. Die datum van die boeredag is na Julie verskuif sodat die stropers die werklike oes van mielies kon demonstreer.
Die boeredagterrein is na mnr. Philip Viljoen se plaas geskuif omdat hy besproeiingslande gehad het waarop hulle kon oes. In daardie jaar was ongeveer 20 uitstallers betrokke. Boere het van heinde en ver gekom om die demonstrasies by te woon, en die uitstallers was baie tevrede met die goeie opkoms en belangstelling.
Die boeredag het aanhou groei – van ’n handjie vol tot honderde boere – en in 1999 moes hulle weer ’n nuwe plek vind wat al die uitstallers en besoekers kon huisves.
Baie werk het in die voorbereiding gegaan van die nuwe terrein op mnr. Johan Pistorius se plaas, Oudehoutspruit, by Val. Die boeredag groei steeds danksy die toewyding van die Waterval-boerevereniging en plaaslike gemeenskap, sowel as die steun van uitstallers en borge.
VAL STEL VOORBEELD
Die Val-boeredag het naam gemaak en ’n belangrike jaarlikse gebeurtenis op die landboukalender geword. Deur die jongste tegnologie en toerusting te demonstreer, kry boere beter insig in nuwe maniere om produktiwiteit op hul plase te verbeter.
Boere kan sien hoe om hul eie opbrengste en wins te vermeerder deur doeltreffender planttegnieke en onkruidbestryding met die nuutste oesspuittegnologie. Stropertegno-
logie, hoe om beter omkeertyd met groter opvangwaens te behaal, asook toerusting om die oes van die land af te kry en in silo’s op te berg, is ook te sien.
Boere ervaar eerstehands al die nuutste tegnologie en dit is steeds die rede waarom boere landwyd dié dag bywoon.
’n Paar jaar gelede is die boeredag se datum na die eerste Woensdag in Julie verander om in die skoolvakansie te val sodat die hele gesin die skou kan bywoon. Vermaak vir oud en jonk is by die dag ingesluit. Dit het bygedra tot die skou se gewildheid omdat dit as ’n prettige én opvoedkundige gesinsuitstappie beskou word.
NUWE PERSEEL
Verlede jaar is die boeredag na die Val-sportklub verskuif waar beter permanente geriewe is. Die Val-boerderygemeenskap, gelei deur die Val-boeredagkomitee, het aansienlike verbeteringe aangebring en dit maak die dag selfs nóg beter vir uitstallers en besoekers.
DANKIE!
Die Val-boeredag is vanjaar op Woensdag 5 Julie by die Val-sportklub. Die Waterval-boerevereniging bedank al die uitstallers en borge van die Val-boeredag vir hul voortgesette ondersteuning.