Dekades van goeie diens!
André Kock en Seun is ’n afslaersmaatskappy wat homself al oor en oor bewys het. Ná vier geslagte in die bedryf kan hy as legendaries beskryf word.
Met André Kock wat al 50 jaar aan die stuur van sake is, is die afslaersmaatskappy André Kock en Seun baie suksesvol in die lewendehawebedryf. Met ’n optimistiese uitkyk op die landbouen rooivleisbedryf gaan hy ’n blink toekoms tegemoet.
André Kock sr. het as 18-jarige seun begin werk by sy oupa Koos Bezuidenhout se afslaersmaatskappy, JBM Bezuidenhout & Kie. Danksy die leiding en voorbeeld van sy begaafde oupa is André vandag ’n formidabele afslaer en sakeman. Ná Koos se afsterwe het sy seun, Jerry, die maatskappy bestuur, terwyl André nog die junior afslaer was.
Dié maatskappy bied kommersiële veilings van lewende hawe op ’n weeklikse grondslag aan in Noordwes, Limpopo en die Vrystaat. Hy behartig ook uitverkopings van boedels, werktuie en eiendomme deur middel van openbare veilings.
ANDRÉ KOCK SR.
André moes nuwe veilings en kliënte werf, kopers en verkopers na die veilings nooi, en die betrokke beeste bewerk en by elke veiling besorg. Daarna het hy die rostrum bestyg en veiling gehou. Ná die veiling het hy, as afslaer, self agter die boeke ingespring om fakture en tjeks uit te skryf.
Uiteraard gaan die afslaer nêrens voordat die boeke klop nie. André sê ’n mens “kan ’n veiling net as ’n sukses beskou as die koper én verkoper gelukkig en tevrede huis toe gaan”.
Sy pligte het egter nie daar geëindig nie. Hy moes ook die beeste wat deur die ring gegaan het, aan hul onderskeie nuwe eienaars besorg, hetsy per voet of per trein.
Die gevolg van hierdie kosbare blootstelling is dat André elke aspek van die lewendehawebedryf ken – van administrasie tot intensiewe inligting van elke veeboer se boerderybedryf in Noordwes.
JBM BEZUIDENHOUT & KIE
Sedert André by sy oupa se maatskappy, JBM Bezuidenhout & Kie, begin werk het, is die maatskappy twee keer deur groot ondernemings oorgekoop.
In 1995, op die ouderdom van 52, het hy besluit om sy oupa se legendariese afslaersnalating na te streef. Met ’n onwrikbare geloof in sy vermoë, met sy seun Malcolm aan sy sy en met sy familie se ondersteuning, twee huistelefone, ’n faksmasjien en ’n lae kontantreserwe is die huidige André Kock & Seun op die been gebring.
Malcolm, die vierde geslag, wou die maatskappy landwyd uitbrei. Met Malcolm en André se visie en gesamentlike kennis en kontakte wat oor die jare heen opgebou is, is nuwe geleenthede geïdentifiseer en veilingspunte in Limpopo en die Vrystaat begin.
Fanie Lombard, André se skoonseun, is die maatskappy se finansiële en administratiewe bestuurder. Die afgelope tien jaar was hy die steunpilaar vir André, Malcolm en die res van die familie-onderneming terwyl die maatskappy van krag tot krag gegaan het.
KULTUUR EN WAARDES
Die maatskappy se kultuur en beginsels is op familiewaardes gegrond. Dit sluit kliënte en werknemers in.
Kliënte word oor ’n gebied van meer as 100 000 km² bedien.
André Kock en Seun het ook ’n uitgebreide advertensie-afdeling wat op die hoogte bly met die huidige advertensietegnieke en -neigings in die wêreld. Die afdeling doen ook navorsing oor die landboubedryf, hou kliënte ingelig en pas nuwe kennis in die bedryf toe. Hy doen gereeld uitgebreide navorsing oor nuwe verbruikersneigings, potensiële nuwe markte vir rooivleis en nuwe geleenthede wat beskikbaar is.
“Die lewendehawebedryf – en in besonder die landbou- en rooivleisbedryf – gaan deur ’n baie onsekere tyd, maar ons beskou dié tye as uiters opwindend,” sê André.
“In hierdie tye skep ons nuwe markte en beraam nuwe planne. As ’n organisasie en entrepreneursonderneming behartig ons nie net veilings nie, maar ons soek ook nuwe markte en geleenthede vir ons mense en wil baanbrekerswerk vir die veeboer doen.”
NAVRAE: E-pos: akock@wam.co.za; aak@megadial.com; webwerf: www.akock.co.za; tel. 053 927 1981/2/3.