BRANDSTOF – WEER ’N DALING IN DIE PRYS VERWAG

Berekenings teen die middel van die maand dui daarop dat verbruikers begin Julie vir die tweede agtereenvolgende maand kan uitsien na ’n daling in brandstofpryse.

Mnr. Dawie Maree, hoof van landbou-inligting en bemarking by FNB, sê ’n daling van 50c/l tot 60c/l kan verwag word vir petrol én diesel weens oorverhalings by albei. “Dit is interessant dat die beweging in die wisselkoers verantwoordelik is vir gemiddeld 3c/l in die oorverhaling. Die daling in internasionale produkpryse is verantwoordelik vir ’n verdere oorverhaling van 55c/l tot 57c/l.”

Hy sê die herstel en redelike sterk vertoning van die wisselkoers is goeie nuus vir toekomstige prysverwagtinge, tensy daar weer een of ander onnodige politieke skok kom.

“Wat die internasionale prys van ruolie betref, het Opul (die olie-produserende uitvoerlande) gepoog om verdere produksiebeperkings in te stel, maar dit het misluk. Mededinging van lande wat nie deel is van Opul nie, beteken dat die produksiebeperkings geen noemenswaardige uitwerking het nie.

Maree sê dit lyk verder of skaliegas-ontginning in Amerika vanjaar weer kop optel en verdere druk op oliepryse plaas.

“Die potensiële daling in brandstofpryse is uiteraard goeie nuus vir boere én verbruikers. Daar is talle boere wat graan oes en die meeste graan word per pad vervoer. Ten opsigte van inflasie-verwagtings hou dit ook goeie nuus in en dit kan moontlik ’n rol speel in die Reserwebank se monetêre beleidskomitee se besluit wat betref die rentekoers. Die volgende vergadering van die komitee is 18 tot 20 Julie.”