DGB SLAAN SLAG VIR SA WYNE IN CHINA
DANKSY ’n ooreenkoms met Cofco (China National Cereals, Oils and Foodstuffs Corporation), die staatsbeheerde verspreider van grane, olies, wyn en voedselprodukte in China, gaan twee bekende Suid-Afrikaanse wynhandelsmerke uit die DGBstal voordeel trek uit die Chinese wynmark, wat na raming oor die volgende drie jaar met bykans 40% gaan vergroot.
Cofco gaan voortaan die Boschendal- en Tall Horse-handelsmerke eksklusief invoer en bemark. Ander handelsmerke in die DGB-portefeulje kan later volg.
Die Chinese mark raak toenemend aantreklik vir Suid-Afrikaanse wynkelders en die vraag na veral gehaltewyne groei in China. Verlede jaar het China altesame 638 miljoen liter wyn ingevoer. Dit verteenwoordig groei van 15% op ’n jaargrondslag. Dis egter nie net volumes wat klim nie. Die invoerwaarde het ook met meer as 16% op ’n jaargrondslag tot $2 364 miljard gestyg, luidens ’n verklaring.
“Daar word voorspel dat wynverkope in China oor die volgende drie jaar met 39,8% kan groei. Dit sal daartoe lei dat China vir Frankryk en Brittanje verbysteek om naas Amerika die wêreld se grootste wynmark te word.”
AVONTUURLUSTIG
Volumegewys is China tans die grootste Asiatiese mark vir Suid-Afrikaanse wyne, en op vyf na Suid-Afrika se grootste uitvoer bestemming.
Mnr. Castle Li, hoofbestuurder van Cofco Wine & Spirits, sê Chinese verbruikers stel al hoe meer belang in wyne uit die “nuwe wêreld”.
Dit het Suid-Afrika se markaandeel in China bevoordeel.
“Die handelsmerke Boschendal en Tall Horse bied twee groot markaandrywers: waarde en agtingswaardige gehalte. Ons sien daarna uit om bewusmaking en vraag na hierdie handelsmerke in die mark te skep.”
Mnr. Tim Hutchinson, voorsitter en hoof- uitvoerende bestuurder van DGB, glo hulle sal baat vind by Cofco se verspreidingsen bemarkingsmag in China deur veral te help dat Boschendal en Tall Horse in ’n verskeidenheid Chinese stede en bemarkingskanale beskikbaar is.
“Ons het agtergekom dat die belangstelling in dié Suid-Afrikaanse wynkategorie opvlam namate verbruikers meer avontuurlustig raak en bereid is om nuwe wynontdekkings te maak Ons is vol vertroue dat die Chinese verbruikers aanklank sal vind by die erfenis en egtheid van ons handelsmerke.”
DGB is Suid-Afrika se grootste onafhanklike wyn-, bier- en spiritualieë produsent, e nC of c o Wine & Spirits een van China se grootste wyninvoerders.
Die maatskappy besit ook Greatwall Winery, een van China se bekendste plaaslike wynhandelsmerke.
DGB se uitvoervolumes en markaandeel in die Verre-Ooste groei bestendig sedert die maatskappy in 2012 ’n kantoor in Hongkong geopen het met die oogmerk om sakegeleenthede in die Asiatiese mark aan te gryp.
‘Chinese verbruikers stel al hoe meer belang in wyne uit die ‘‘nuwe wêreld”. Dit het Suid-Afrika se markaandeel in China goed geloon.’