PLAAGBESTUUR: DÍT WERK VIR ZZ2
’n Meer komplekse grondbiologie en ’n groter teenwoordigheid van natuurlike roofdierorganismes is maar net twee van die voordele wat die megaboerdery ZZ2 ervaar sedert hy sowat 16 jaar gelede sy natuurboerdery-konsep ontwikkel het.
Mnr. Hendrik Pohl, een van ZZ2 se appelprodusente in die Ceres-omgewing, het op Hortgro Science se tegniese simposium vertel hoe die onderneming 16 jaar gelede besef het dit is nie meer ekonomies volhoubaar om tamaties op ongesonde grond te kweek nie.
“Om 1 ha tamaties te lewer het ons 3 ha grond nodig sodat ons die grond kan roteer om op gesonde grond te plant. Sodra jou grond ongesond of jou stelsel onder druk raak, raak die rotasietydperk ál langer. Ons moes later agt, nege jaar wegbly voor ons weer op dieselfde grond kon plant.
“Ons het dus nie meer 3 ha nodig gehad om 1 ha tamaties te kweek nie, maar 9 ha grond met infrastruktuur.”
Dit was die vonk vir die natuurboerderykonsep. “Die landboupraktyke en -prosesse wat deel vorm van natuurboerdery, is gemik daarop om die beste tegnologie in harmonie met die wette van ’n lewende natuur te gebruik. Dit beteken ons moet ons omgewing leer ken, en saam met dit werk en boer.”
Danksy natuurboerdery het ZZ2 ook sy rug gekeer op harde, industriële boerderykonsepte en hom eerder toegespits op meer organiese boerderybeginsels.
“Natuurboerdery-gegronde beginsels gaan oor meer as net landboupraktyke. Dit bepaal ons hele verhouding met ons natuurlike omgewing. Die beginsel gaan nie net oor plaagbestuur nie, maar ook oor waterbestuur, voeding, mensebestuur en sosiale verantwoordelikhede,” verduidelik Hendrik.
Vanuit ’n plaagbestrydingsoogpunt was die eerste stap om kompos en bedekkings (mulch) in die boorde te begin gebruik.
“Die hele filosofie was om die grond gesond te kry, want dit sou ons help om vinniger ’n gesonde omgewing vir ons gewasse te skep.”
Die boerdery het net sowat 20 m3 gehaltekompos op die grond uitgestrooi om as inspuiting vir die grondbiologie te dien. Dit word met bedekking toegemaak.
“Ons het die goeie ouens vanaf ’n eksterne bron af teruggebring na ons grond toe.
“Die bedekking help om ’n gunstige omgewing te skep vir die mikroörganismes wat ons inbring.”
Binne ’n jaar is erdwurms in die grond opgemerk. Deesdae is die diversiteit in die grond verstommend – met tot sewe soorte swamme wat met die oog waargeneem kan word. Wortels ontwikkel ook tot sowat 800 mm diep.
Geïntegreerde plaagbestuur vind plaas. “Ons het twintig jaar gelede ’n harde benadering gevolg waar ons elke 14 dae plae doodgespuit het. Nou volg ons ’n sagte benadering. Eers wanneer ’n plaag ’n ekologiese probleem raak, roer ons dit aan,”
vertel Hendrik.
Monitering het dus vir die boerdery baie belangrik geraak – nie net van die plae nie, maar ook van die voordelige organismes in die stelsel.
Roofaalwurms en -myte word eers die kans gegun om hul werk te doen voor spuitmiddels nader getrek word. Deesdae is daar ’n beter balans tussen skadelike en voordelige aalwurms. Bloedluise is ook meer in balans.
“Die plaag gaan eerste kom, voor die roofdierorganismes, want daar moet kos vir laasgenoemde wees. In die verlede het ons op 40% besmetting gespuit, maar nou kners ons op ons tande en gee die roofdierorganismes eers kans om hul werk te doen,” vertel hy.
“Dis moeilik om van chemiese middels weg te kom en ons is nie organiese boere nie, maar wanneer ons moet, probeer ons om plaagspesifiek te spuit en kies middels wat die laagste moontlike impak het op die goeie ouens wat biologiese beheer uitoefen. Die afgelope twee seisoene het ons byvoorbeeld probleme gehad met spinnekoppe en ons moes spuit, maar ons het ’n produk gekies wat die kleinste impak op die roofdierbevolking het.”
Danksy die sagter benadering kom die boerdery deesdae ook weg met net drie bespuitings in boorde met hoë kodlingmotdruk. In die verlede het hy elke 14 dae gespuit.
Hendrik het ook foto’s gewys van ’n boord wat in 1996 aangeplant is, maar laas in 2002 teen aalwurm of bloedluis behandel is.
“Geïntegreerde plaagbestuur raak ingewikkeld, maar dis ook opwindend om te sien wat die impak is as jy klein veranderinge aan jou bestuurstyl maak. Die balans en integrasie wat dit bring, is ongelooflik.”
— LUCILLE BOTHA