SITRUS ONDER SKADUNET IN SOEKLIG
Die produksie van sitrusvrugte onder skadunet is tot nou nuwe tegnologie waaroor nog vele vrae bestaan, maar min inligting beskikbaar is. Om hierdie rede het die sitrusbedryf besluit om ’n onafhanklike navorsingsprogram van stapel te stuur, sê dr. Paul Cronjé, die portefeuljebestuurder van navorsing in sitrusproduksie van Citrus Research International (CRI). Hy is aan die departement hortologie by die Universiteit Stellenbosch gesekondeer.
Die projek, Research in Citrus Exports, strek oor drie jaar en word gesamentlik deur die CRI en die Departement van
Wetenskap en Tegnologie gefinansier. In die navorsing sal klem gelê word op die invloed van skadunet op vruggehalte en of die hoeveelheid vrugte van uitvoergehalte daardeur verhoog kan word.
“Die voorlopige data oor die invloed van skadunet in die 2016-seisoen op Citrusdal het getoon dat daar nie net ’n verhoging in opbrengs was nie, maar ook ’n beter tellingverspreiding waar die vrugte onder wit skadunet met 20%-deurlaatbaarheid verbou is. Die beskerming wat die net bied, het ook gelei tot minder oppervlakletsels, soos dié weens windskade. Dit het ook nie die skilkleur en suikerinhoud van die vrugte benadeel nie.”
Paul sê die bome het — soos verwag kan
word met ’n afname van 18% tot 20% minder sonlig — meer vegetatiewe groei ontwikkel. Dit was egter nie ten koste van produksie nie, sê hy.
“Die impak van skadunet op die voorkoms en bestryding van sitrusplae sal ’n belangrike deel van die navorsing wees, asook die aanwending daarvan in grootskaalse kommersiële boerderye.
“Tans blyk dit dat skadunet die winsgewendheid van sitrus baie kan verhoog deur hoër opbrengste en vrugte van beter gehalte. In ’n seisoen waarin uiterste klimaatstoestande, soos hael of hittegolwe, in die blom- en vrugsettyd voorkom en produksie drasties kan benadeel, kan skadunet ook die nodige beskerming en die nadelige gevolge daarvan verminder.”