Nuwe baadjie vir ou bekendes
Argo se jongste Landini-trekkermodelle het ’n nuwe voorkoms en volg die tradisionele Landini-ontwerpstyl sonder om werkverrigting in te boet.
Argo S.p.A het onlangs sy medium- en laekilowattklas trekkerreekse aangepas. Van dié ou trekkermodelle, wat reeds geruime tyd in Suid-Afrika beskikbaar is, word nou vervang met nuwe reekse wat spog met nuwe name én ontwerpe.
Argo Tractors in Italië is deurlopend toegespits op die produkontwikkeling van nuwe trekkermodelle. Sodoende hou die maatskappy tred met nuwe landboumetodes wat voortdurend ontwikkel, wêreldwyd en ook in die Suid-Afrikaanse landboumark.
Van die ou modelreekse wat vervang word sluit in: Landini Technofarm word die Landini Multifarm-reeks. Landini 60-reeks word die Landini Super 7865/8865reeks. Landini Globalfarm word die Landini Super 90/100/110reeks. Dié nuwe trekkermodelle gaan nou die meer tradisionele Landini-ontwerpstyl volg.
LANDINI MULTIFARM
Die Landini Multifarm-reeks bestaan uit twee modelle, naamlik die Multifarm 75 (50 kW) en die Multifarm 90 (61 kW).
Albei dié modelle is met viersilinder Perkins-dieselenjins toegerus en voldoen aan Vlak 2omgewingstandaarde. Die wringkrag is onderskeidelik 273 N.m en 362 N.m.
Die Multifarm-trekkers is standaard toegerus met ’n viergang-12+12-ratkas met ’n meganiese spoelkas.
Die kragaftakker bied spoedkeuses van 540/540E r/min.
Die meganies beheerde hysstelsel met KAT11-driepuntkop- peling verskaf al die normale werktuigbeheerfunksies met ’n hysvermoë van 2 700 kg.
Twee afstandbeheerkleppe word ondersteun deur ’n hidrouliese oopvloeistelsel met ’n vloeitempo van 42 liter per minuut.
Die Multifarm is in tweewielen vierwielaandrywing beskikbaar. Tans is dit net in platformkonfigurasie beskikbaar.
LANDINI SUPER 7865 EN SUPER 8865
Die welbekende en betroubare Landini 60-reeks wat bykans 23 jaar op die plaaslike mark beskikbaar was, word nou vervang deur die Super 7865 (55 kW) en die Super 8865 (60 kW).
Hierdie nuwe modelle is met viersilinder Perkins-dieselenjins toegerus met regstreekse brandstofinspuiting en voldoen aan Vlak 2-omgewingstandaarde. Die Super 7865 lewer 290 N.m wringkrag en die Super 8865 294 N.m. Die basiese12+12ratkas met meganiese spoelkas bly onveranderd. Die kragaftakker verskaf spoedkeuses van 540 r/min. en 1 000 r/min.
Die meganies beheerde hysstelsel met KAT11-driepuntkoppeling verskaf al die normale werktuigbeheerfunksies met ’n hysvermoë van 2 700 kg. Twee afstandbeheerkleppe word ondersteun deur ’n hidrouliese oopvloeistelsel met ’n vloeitempo van 53 liter per minuut.
Die Landini Super 7865 en Super 8865 is in tweewiel- en vierwielaandrywing beskikbaar. Dit is tans net in platformkonfigurasie beskikbaar.
LANDINI SUPER 90/100/110-REEKS
Die ou Globalfarm-reeks is aangepas en die nuwe reeks bestaan uit die Landini Super 90 (61 kW), Super 100 (68 kW) en Super 110 (75 kW). Die nuwe modelle is toegerus met viersilinder Perkins-dieselenjins met regstreekse brandstofinspuiting, en tussenverkoeling. Die enjins voldoen aan Vlak 2-omgewingstandaarde.
Die Super 90 lewer 362 N.m wringkrag, die Super 100 384 N.m en die Super 110 416 N.m.
Die basiese12+12-ratkas met meganiese spoelkas bly onveranderd. Die kragaftakker bied spoedkeuses van 540 r/min. en 1 000 r/min.
Die meganies beheerde hysstelsel met KAT11-driepuntkoppeling verskaf al die normale werktuigbeheerfunksies.
Die hysvermoë met twee hulpsilinders is: Super 90 – 2 600 kg opsioneel. Super 100 en Super 110 – 3 700 kg standaard. Twee afstandbeheerkleppe word ondersteun deur ’n hidrouliese oopvloeistelsel met ’n vloeitempo van 52,3 liter per minuut.
Die Super 90/100/110 is in twee- en vierwielaandrywing en in platform- of kajuitkonfigurasie beskikbaar.