Hilux bult sy spiere
Die voertuigmark is ’n perd van ’n ander kleur met neigings, kooppatrone en markimpakte wat voortdurend verander. Tog bly die Toyota Hilux-reeks een van Suid-Afrika se gunstelinge.
Toyota het die voertuigmark versigtig ontleed en roem homself op sy klantgerigtheid en diepgaande klantenavorsing. Die opgekikkerde Hilux SRX-modelreeks is die gevolg van dié benadering.
STEWIGER ROMP
Die grootste verandering is die omskakeling van die gewese “smalromp”-ontwerp na die nuwe “wyeromp”-samestelling. Die Hilux SRX is nou aansienlik breër, hoër en stewiger.
Die omskakeling na die wyeromp-ontwerp bied fris, ingeboude wielnisse (soos dié van die bestaande Raider-modelle), wat by die nuwe breër voorbufferontwerp pas. Danksy die nuutgevormde buitekant is die enkelkajuit- en dubbelkajuitSRX-weergawes 55 mm breër teen 1 855 mm.
Die verlengde kajuitmodelle, die Xtra-cab, pronk reeds met ’n wye romp, dus het al drie rompvorms nou dieselfde breedte-afmetings aan die buitekant.
Die deurspieëls het ingeboude flikkerligte. Dit behou die dofswart afwerking en elektriese verstelling.
Die buitekant is met breër 17”allooisierwiele (voorheen was dit staalwiele) toegerus wat met 265/65/R17-veelterreinrubber geskoei is (dieselfde as dié van die Raider-reeks).
LEEFSTYL
Die Hilux SRX se jongste ronde opkikkerings posisioneer dié nuwe Hilux om ’n unieke ruimte in die mark vir ligte handelsvoertuie te vul.
Hoewel die SRX sy eienskappe behou om enigiets oral te kan doen, sluit die model nou verbe- terde buitestilering in wat gewis ook in die smaak van ontspanningskopers sal val.
Die nuwe SRX-pakket pas aan by die GD6-enjin van 2,4 liter wat 110 kW en 400 N.m bied (of die 2,7 liter-petrol VVTi) vir ’n bakkie wat in die week hard sal werk en naweke ewe hard kan speel – en deur die bank ook goed lyk.
Die modelreeks bly dieselfde as nou en bied steeds ’n magdom verskillende samestellings, enjins en rompvorms, wat verseker daar is altyd ’n Hilux vir alles en almal.
Allooisierwiele is sonder twyfel een van die belangrikste toevoegings tot ’n voertuig se voorkoms.
Op dié gebied is al die 2,8 GD-6 en 4,0 V6 Fortuner-modelle nou met treffende 18”-allooisierwiele toegerus. Die nuwe vellings, wat die vorige 17”-weergawe vervang, het 265/60/R18-bande en kenmerkende terugvloeiende speke met masjienafwerking wat die dubbel-dimensionele ontwerp beklemtoon.
Die intreevlak-2,7 VVTi en die 2,4 GD-6 behou hul stylvolle 17”-dubbelrib-sierwiele.
WEELDERIGE LEER
Die 2,7 VVTi en 2,4 GD-6 Fortuner-weergawes is met leerbeslag toegerus, wat die bestaande tekstielafwerking vervang. Dit kos niks bykomend nie, wat die hoë waarde vir geld van die aanbod net verder vergroot.
Die Fortuner is die enigste sportnuts in sy klas wat ’n só aantreklike intreevlak-prys bied gekombineer met omvattende toerusting.