Pryse van wol en bokhaar knel boere
Wol- en sybokhaarproduksie is belangrik in die Oos-Kaapse landbousektor. Die droogte plaas ’n demper op die bedryf, maar ’n paar goeie veilings het wel hoogtepunte opgelewer.
Internasionaal gesogte sybokhaar uit die Oos-Kaap word uit die streke Uitenhage, Kirkwood, Jansenville en Graaff-Reinet gelewer.
Theuns Botha berig bokhaarpryse het vanjaar aansienlik geval. Mnr. Andries Greeff, voorsitter van die Suid-Afrikaanse Sybokhaarkwekersvereniging, het egter op die vereniging se onlangse jaarlikse kongres op Graaff-Reinet gesê die prys van bokhaar sal weer styg.
Boere spook boonop met die droogte en siektes, soos hartwater, wat produksie met 8% laat tuimel het.
Daar was ook goeie nuus. Die Wes-Kaapse boer me. Gay van Hasselt van die Van Hasselt-boerdery by Prins Albert is vanjaar ’n wêreldrekordprys van R896/kg vir ’n baal somerkleinbokkiehaar betaal. Dit verbeter die vorige wêreldrekordprys van R859/kg wat verlede jaar opgestel is. Die betrokke baal se wenbod van R73 561 is op mnr. Anthony Kirsten van Stücken & Company van Uitenhage toegeslaan.
Hierdie verstommende prys is betaal in ’n seisoen wat gekenmerk is deur pryse wat teruggesak het.
Die sterker rand en die aanbod se swakker gehalte het sybokhaarpryse in Desember op die laaste veiling van die 2016-seisoen onder druk geplaas.
Die prys van kleinbokkiehaar het met 2,6% gedaal, terwyl jong- en fyn grootbokhaar met onderskeidelik 3% en 2% goedkoper was.
Die prys van sterk grootbokhaar het met 2% gestyg. Die gemiddelde markaanwyser het egter in Desember met 1,8% teruggesak tot R185,00/kg, oftewel sowat 15% laer as ’n jaar vantevore.
Die mees onlangse geskiedkundige veiling in Port Elizabeth was ’n aangename verrassing. Die spesiale veiling is by die hoofkantoor van Sybokhaar Suid-Afrika in Port Elizabeth gehou waar 15 bale sybokhaar wat vir die gesogte Ermenegildo Zegna-kompetisie vir somerkleinbokkiehaar ingeskryf is, verkoop is.
Mnr. Billy Colborne en Seun van Willowmore het ’n baal teen R867/kg verkoop, terwyl mnr. J.H Lategan van Aberdeen se baal R801/kg behaal het. Die totale veilingsomset uit die 15 bale was bykans R785 000. Stücken & Co en Samil was die enigste kopers.
BKB Bpk se afdeling vir veselbemarking het op 7 Junie berig op die 35ste wolveiling van die 2016-’17-seisoen het die Cape Wools Merinowolmarkaanwyser met 2,2% gedaal. Die prys vir skoonwol het op ’n gemiddelde prys van R152,18/kg gesluit.
Die grootste kopers op die veiling was Standard Wool (3 579 bale), Lempriere South Africa (3231 bale) en G Modiano (2694 bale). Van die 13028 bale wat aangebied is, is 12816 bale (98%) verkoop.
Die hoogste prys op die BKB-veiling in Port Elizabeth was vir wol van CJM Schmidt & Seun van Dordrecht in die Oos-Kaap (AWEX-tipe MWF4E.79; 18,3 mikron en ’n treksterkte van 46 NKT). Dit het ’n prys van R165,10/kg behaal.
Die nuwe seisoen se eerste veiling word op 16 Augustus gehou.