Klapperkoekies
Die perfekte koekies om in ’n beker rooibostee te doop.
180 g sagte botter 125 ml strooisuiker 1 ekstragroot eier 5 ml vanieljegeursel 2 ml amandelgeursel 480 ml bruismeel 125 ml fyn klapper
Voorverhit die oond tot 180 °C en voer ’n groot bakplaat met bakpapier uit. Spuit liggies met kleefwerende kossproei. Verroom die botter en suiker tot lig en romerig. Voeg die eier, vanieljegeursel en amandelgeursel by en klits goed. Voeg die meel en klapper by en meng tot ’n gladde
deeg. Rol die deeg in bolletjies en pak op die bakplaat. Druk die koekies versigtig platter met ’n vurk. Bak vir ongeveer 10-12 minute tot strooikleurig.
Laat op die bakplaat afkoel tot ferm genoeg om met ’n eierspaan of paletmes af te lig.
Laat die koekies verder op ’n draadrak tot kamertemperatuur afkoel. Lewer ongeveer 5 dosyn koekies.
Kaneelsuiker roomkaas koekies
Roomkaas gee ’n sagte tekstuur, rykheid en heerlike smaak aan koekiedeeg. Die koekies is sagter as gewone soetkoekies en moet liefs binne 3 dae nadat dit gebak is, opgeëet word.
125 g sagte botter 90 g roomkaas 375 ml versiersuiker 1 ekstragroot eier 5 ml vanieljegeursel 430 ml koekmeel 3 ml bakpoeier
180 ml kaneelsuiker (met strooisuiker gemaak), om in te rol
Verroom die botter, roomkaas en versiersuiker goed saam. Voeg die eier en vanieljegeursel by en klits goed. Voeg die meel en bakpoeier by en maak aan tot ’n sagte deeg. Bedek en verkoel die deeg vir 1 uur voor jy dit gebruik.
Voorverhit die oond tot 180 °C en voer ’n paar bakplate met bakpapier uit. Spuit liggies met kleefwerende kossproei. Rol die deeg in ewe groot bolletjies en rol elke bolletjie in kaneelsuiker. Pak dit op die bakplate. Druk elke deegbolletjie liggies platter met ’n teelepel. Bak die koekies vir 8-10 minute, tot die onderkante strooikleurig is. (Die koekies sal nog sag wees.) Laat die koekies vir ’n paar minute op die bakplate staan tot dit ferm genoeg is om met ’n eierspaan of paletmes af te lig. Laat op draadrakke tot kamertemperatuur afkoel. Bêre in ’n lugdigte houer of koekblik. Lewer 5 dosyn koekies.
Neutbiscotti met droë pere
My pa het onlangs vir my ’n wavrag droë pere gebring, wat ek in alles van granola tot poeding en selfs saam met wildsvleis gebruik het. Die lekkerste resep wat ek daarmee gemaak het, was hierdie biscotti. Met die koekies se uitdroogslag word die vrugte se geur selfs meer gekonsentreerd en die tekstuur soos tameletjie. Maak seker dat jy die pere baie fyn snipper (gebruik ’n skerp kombuisskêr daarvoor). Dit maak die sny van die heel biscotti ook makliker.
1 ekstragroot eier 1 ekstragroot eierwit 125 ml kookolie 200 ml suiker 5 ml vanieljegeursel 100 g amandels, grof gekap 4-5 droë pere, baie fyn gesnipper 400 ml koekmeel 1 ml sout 7 ml bakpoeier
Klits die eier, eierwit, olie, suiker en vanieljegeursel saam. Voeg die amandels, pere, meel, sout en bakpoeier by en meng tot ’n deeg. Bedek en verkoel die deeg vir 2 uur.
Voorverhit die oond tot 180 °C en voer ’n groot bakplaat met bakpapier uit. Spuit liggies met kleefwerende kossproei.
Verdeel die deeg in twee en vorm in rolle van 30 cm lank. Plaas die deegrolle op die voorbereide bakplaat en laat genoeg ruimte vir die deeg om te sprei. Verlaag die oondtemperatuur tot 160 °C en bak vir 20 minute tot ferm en ligbruin. Laat afkoel tot louwarm en sny die rolle in skyfies. Pak die koekies weer op die bakplaat en droog dit teen 100 °C uit. Laat dit in die oond tot kamertemperatuur afkoel. Bêre in ’n lugdigte houer of koekblik. Lewer sowat 40 biscotti.