DIE ANDER SÊ
Die Departement van Landelike Ontwikkeling en Grondhervorming het ’n staatsamptenaar, mnr. Vukile Magqabi, ’n landdros, van die plaas Hill View, Oos-Londen, afgesit. Hy het die plaas bewoon ná hy ook van dié departement geld ontvang het. Die uitsetting volg op bewerings dat hy dié vee-en-koolplaas wanbestuur het.
Toe joernaliste by die plaas aangedoen het, het hulle dit leeg gevind. Die plaasopstal se deure was wawyd oop en die werkersbehuising verlate. Kragdrade is van die mure afgeruk en die landerye was verwaarloos, vergeleke met die naburige plaas wat bewerk word.
Die National African Farmers’ Union (Nafu) bevraagteken die uitsetting van dié eens suksesvolle plaas en vra hoekom die Regering teen ’n paar individue optree wanneer daar ’n beduidende aantal staatsamptenare was wat plase bedryf. “Hulle behoort alle staatsamptenare wat plase bedryf, uit te sit. Hoekom moet ’n paar individue die teikens wees oor agendas binne die departement?” sê me. Phumza Vitshima, voorsitter van Nafu se Oos-Kaapse tak. Sy sê die plaas is van Magqabi weggevat en aan ’n ander boer belowe. Hulle vermoed dié boer is nie op die waglys nie.
Die departement se woordvoerder, me. Linda Page, het bevestig die plaas word tans aan ’n ander voornemende boer oorgedra.