SITRUS | Franse onderskep besmette vrugte

Suid-Afrika se skoon rekord vir sitrusuitvoer na die Europese Unie (EU) vanjaar het aan die einde van Junie skipbreuk gely toe vyf besendings met valskodlingmotbesmetting in Foss, Frankryk, onderskep is. Só sê mnr. Deon Joubert, die Suid-Afrikaanse Sitruskwekersvereniging (CGA) se gesant vir handelsgeleenthede in Europa.

“Dit is ’n groot teleurstelling, veral in die lig van die noukeurige stappe en protokolle wat die CGA vanjaar deur die verskillende fokusgroepe vir sy lede saamgestel het,” sê Joubert.

Die uitvoerseisoen het tot dusver baie goed vir Suid-Afrika verloop, met geen onderskeppings weens swartvlek nie. By ander besendings waarin daar tekens van valskodlingmot gevind is, was dit dooie larwes of foutiewe identifikasie.

Die laaste vyf bevestigde onderskeppings plaas Suid-Afrika egter op die agtervoet omdat valskodlingmotbesmetting van volgende jaar af ’n “aanmeldbare” plaag in die EU gaan wees. Daarom werk die CGA en die Suid-Afrikaanse Departement van Landbou, Bosbou en Visserye vanjaar hard daaraan om werkbare en aanvaarbare protokolle vir die voorkoming van die verspreiding van valskodlingmot na die EU op te stel.

Indien Suid-Afrika nie aanvaarbare protokolle kan voorlê en toepas nie, bestaan die risiko dat die EU koue sterilisasie gaan voorskryf, wat ’n groot koste-impak op Suid-Afrikaanse uitvoer sal hê en winsgewendheid in die gedrang kan bring.