500 kg renosterhoring trek die verkeerde soort aandag
TERWYL private renostereienaars meen die Departement van Omgewingsake se amptenare is moedswillig om allerlei voorwaardes vir ’n beoogde veiling van renosterhorings te stel, sê die departement die bemarking rakende die veiling is misleidend.
Mnr. John Hume, wat byna 1500 renosters besit, wil op 21 Augustus ’n veiling aanbied waar nagenoeg 500 kg renosterhoring opgeveil sal word. Mnr. Pelham Jones, voorsitter van die private renostereienaarsvereniging (PROA), sê egter dit voel of die departement ’n stokkie daar- voor probeer steek met vereistes wat nie deur die wetgewing op bedreigde en beskermde spesies (Tops) gerugsteun word nie.
GOEDKEURING
Die departement spreek in ’n verklaring sy kommer uit oor die bemarking van die veiling in Chinees en Viëtnamees. “Dit wek die indruk dat Suid-Afrika internasionale handel goedkeur en bevorder,” lui die verklaring.
Die betrokke webwerf sê egter niks oor internasionale han- del nie, maar die departement is nogtans bekommerd oor die beeld wat die ander tale uitdra.
’n Onafhanklike ondersoek deur die Amerikaanse nie-regeringsorganisasie Elephant Action League het getoon dat China die grootste mark vir onwettige renosterhoring in Asië is – nie Viëtnam soos wat algemeen vermoed is nie. Die organisasie sê die druk is nou op die Chinese regering om stappe te doen om die onwettige handel hok te slaan.