Versterk jou boerdery by die Veeskool
DIE program vir die komende Veeskool is propvol pitkos vir skaap- en beesboere, met ’n gesonde balans tussen lesings en praktiese bedrywighede, soos besoeke aan plase en ’n voerkraal.
Daar is vanjaar ’n sterk kleinveekomponent op die program.
Die Veeskool vind van Woensdag 18 Oktober tot Vrydag 20 Oktober by Aldam naby Ventersburg in die Vrystaat plaas.
Dr. Michael Bradfield, organiseerder van die geleentheid, wat deur die Lewendehawe Registrerende Federasie (LRF) en Breedplan aangebied word met
Landbouweekblad as mediavennoot, sê hulle het geen moeite ontsien om die wêreld se beste veekenners te identifiseer en na die skool te bring nie.
“Vir boere is dit ’n geleentheid om by die wêreld se beste kundiges op hul vakgebied te leer en aan ons eie voorste kundiges bied dit ’n kans om met hul internasionale eweknieë skouer te skuur.
“Die meeste deelnemers aan die Veeskool is bona fide kommersiële veeboere wat daarna streef om hul doeltreffendheid en kuddebestuur tot ’n hoër vlak te neem. Daarom is die skool se tema vanjaar ‘Deelname aan die vleiswaardeketting deur middel van verbeterde bestuurspraktyke’,” sê Bradfield.
DRIE DAE
Op die Woensdagmiddag kan deelnemers op ’n voorrangbasis (eerste inskrywings kry eerste keuse) kies tussen een van drie besoeke: Sparta se voerkraal by Marquard; mnr. Llewellyn Angus van Arlington se stelsel van aangeplante weidings en intensiewe lamhokke met Merino’s; of mnr. Brian Angus, ook van Arlington, wat besoekers sal leer oor seleksie vir vleisgehalte en waardetoevoeging.
Donderdagmiddag se praktiese sessies sluit onder meer die besigtiging van verskeie beeste en kleinvee en praktiese lesings in. Vir gevorderde stoettelers word ’n werksessie oor genomika onder leiding van prof. Ben Hayes, wêreldkenner van genomika van Australië, gehou.
Die skool kos R6 950 (BTW uitgesluit; R7 923 met BTW) om ál drie dae by te woon. Dit sluit verblyf, alle etes, plaasbesoe- ke, lesings en afskrifte van die lesings in. Bel me. Charmaine Alberts by tel. 051 821 1783 of stuur ’n e-pos aan: palberts@
telkomsa.net om ’n besprekingsvorm te bekom.