LANDBOUNUUS UIT AFRIKA
1 SWAZILAND | Hoendernood dreig oor voëlgriep in SA Swaziland kan sy eie pluimveekrisis in die gesig staar as die uitbreking van die H5N8-voëlgriepvirus in Suid-Afrika nie gou gestuit word nie, waarsku dr. Xolani Dlamini, direkteur van Swaziland se veeartsenydiens. As bestaande voorraad nie betyds vervang kan word met ingevoerde, lewende hoenders uit Suid-Afrika nie, kan ’n hoenderskaarste ontstaan en pryse laat styg.
Mnr. Sibusiso Mngadi, ’n voormalige woordvoerder van Swaziland se sentrale bank, het op Facebook gesê hoendervleis in dié land sal binne die volgende maand of twee opraak.
“Die meeste boere is bankrot omdat Swaziland nie bevrugte eiers uit SuidAfrika kan invoer nie. Doen wat julle kan om voorraad op te bou. Hoendervleis bly die bekostigbaarste bron van proteïen op die mark.” — Swazi Observer 2 ZAMBIË | Mielieboere pleit vir vrye mark
Kommersiële mielieboere in Zambië sal met die huidige produksiekoste, opbrengste en lae pryse kwalik dié seisoen gelyk speel. Hulle is ook baie ongelukkig oor staatsinmenging in die mielieprys.
Verlede seisoen het die regering mielieuitvoer verbied ten spyte van ’n gesonde surplus en ’n groot vraag in die naburige Demokratiese Republiek van die Kongo (DRK), waaruit boere waardevolle buitelandse valuta sou kon verdien. Die DRK voer egter eerder mielies uit Suid-Afrika in omdat eersgenoemde se regering nie Zambië as ’n stabiele voorsieningsbron beskou nie. — African Farming