‘Wild bly goeie belegging’
Van heeltydse boere tot sakemanne uit die betonoerwoud belê in die wildbedryf. Landbouweekblad het met mnre. Tebogo Mogashoa, ’n entrepreneur en wildboer, en Lood Bester, besturende direkteur van Wildswinkel, oor dié landboubedryf gesels.
Wildswinkel het onlangs die Wildlife Legacygroep se veiling buite BelaBela in Limpopo aangebied. Van die veilingslokaal en katalogus tot die helikopters wat buite die beste parkeerplek gekry het, getuig van dié bedryf se sukses. Dié veiling het ’n omset van R37 680 000 behaal (sien die foto’s op bl. 84).
“Ek glo ons verwagtinge is oortref as ’n mens die huidige ekonomiese klimaat in ag neem,” sê mnr. Tebogo Mogashoa, ’n entrepreneur en wildboer.
Buffalo Creek, Shona Langa, Poon Liebenberg Wildlife, Romaco Ranch, Burkea Wild en Tebogo se eie Babirwa Wildlife is deel van dié groep van ses wildteelplase.
Tebogo sê al die mense in dié groep dink ver vooruit en almal het soortgelyke oortuigings oor nalatenskap.
“Ons is almal betreklik naby aan mekaar tussen Vaalwater, Thabazimbi en BelaBela. Ek is genooi om deel te word van ’n bestaande groep wildtelers. Die groep is herdoop tot Wildlife Legacy en dié was ons tweede veiling onder die vaandel van die nuwe handelsmerk.”
WILDPRYSE
Mnr. Lood Bester, besturende direkteur van Wildswinkel, is optimisties oor wildspryse.
“Dit gaan nie net daaroor of dit ’n gouewildebees of ’n OosAfrikabuffel is nie. Dit gaan ook oor die dier se gehalte en die potensiële waarde van sy nage slag. Só sal ’n gemsbokbul van stoetgehalte met uitsonderlike horings ’n prys van R450 000 behaal, maar ’n kommersiële bul net R5 000.
“Tot onlangs toe was dit ook nog ongewoon om gewone gemsbokke met 42 duimhorings op ’n veiling te kry, maar met verloop van tyd sal meer sulke diere beskikbaar word.
“Wildboere werk toegewy om diere van topgehalte vir die ope mark te teel.”
Tebogo sê die mark volg nou meer normale neigings van vraag en aanbod.
BETROUBARE BELEGGINGS
“Wildsoorte, soos die buffel, eland, swartwitpens en bastergemsbok, is betroubare beleggings. Telers pas ook aan by die vraag in die jagmark. Ons moet ook nie die invloed van die groeiende wildsvleisbedryf uit die oog verloor nie,” sê hy.
Die volwassewording van die bedryf is volgens Tebogo ’n goeie ding, want dit bring stabiliteit en verminder risiko.
“Dit is nie ’n bedryf vir ongeduldige mense nie. Die wildbedryf is nie een waarin jy vinnig ryk word nie. Nes die ander boere hier vandag, glo ek in die bedryf en ons sal aanhou om daarin te belê.
“Natuurlik is ons almal bekommerd oor die onsekerheid rakende grondeienaarskap, maar sake, soos grondhervorming, is politieke kwessies wat hul gang sal gaan.
“Intussen hou ons aan om in ons boerderye te belê en om op die platteland werk te skep. Dit is immers waar dit die nodigste is,” sê hy.
DROME KOS GELD
“Die wildbedryf is baie jonk vergeleke met ander landboubedrywe. In die beginjare het suksesvolle sakelui en entrepreneurs baie kapitaal in wildsplase belê,” sê Lood.
“Die leefstylfaktor was die grootste aansporing, asook die hunkering na ’n plekkie in die bosveld vir ontspan, wildkyk of jag saam met vriende en familie.”
Die gesogtheid van sogenoemde kleurvariante of skaars wild het wildsplase se beleggingswaarde skielik van ’n leefstyldroom verander na ’n winsgewende eiendom.
“Dié ekonomiese dryfveer het die wildteelmark en die waarde van skaars wild vinnig laat toeneem. Die keerpunt in die mark het in 2015 gekom.”
VRAAG EN AANBOD
Vraag en aanbod, die stand van die ekonomie en die droogte het volgens Lood ’n groot rol gespeel in die normalisering van die wildpryse.
Lood is optimisties oor die bedryf se planne om nuwe beleggers te lok. Daar is ook groot geleenthede om aan bestaande kommersiële boere die beleg-gingswaarde van wild te verduidelik en sodoende ook te oortuig om te diversifiseer na wild.
“Ons moet stadsmense inlig oor die beleggingsmoontlikhe-de in die wildbedryf sonder dat hulle ’n eie plaas hoef te besit. Hulle is ’n ander bron van nuwe toetreders.”
WILDSWINKEL
As besturende direkteur van Wildswinkel is Lood baie tevrede met die maatskappy se groei.
“Ons het verlede Januarie die veilingsonderneming gestig en die vinnige groei het ons verwagtinge oortref. Jy moet jou groei aanpas by die sektor waarin jy sake doen. As ons ’n oorvloed veilings in die mark stort, maak ons net die sektor seer. Ons wil dus sover moontlik vir kopers én verkopers ’n gesonde mark verseker,” sê Lood.
Wildswinkel behartig ook regstreekse wildverkope, verskaf versekering aan wildboere en het onlangs ook ’n reeks wildvoere bekend gestel. Al die produkte en dienste lê klem op die wildbedryf. Jagsafari’s is volgende in hul visier.