‘Sussex is rooi goud’
Die wiel is lankal ontwerp, maar ’n mens kan altyd verbeter. Sussextelers moet dus hul geleenthede benut.
Ná die uitdagende laaste paar jare waarin die klimaat en ander natuurelemente vir elke boer ’n besonderse uitdaging was, kan ek met groot vreugde sê Sussextelers gooi nie maklik die handdoek in nie. Die Sussex is een van die min beesrasse wat nie dieregetalle in die afgelope jaar weens die droogte verloor het nie. Dit is ’n pluimpie vir sowel die ras as die telers wat goeie bestuur in moeilike toestande toegepas het.
Ons is besig om ’n nuwe era in te gaan waar verandering aan die orde van dag is. As die verandering buite jou boerdery vinniger is as waarby jy kan aanpas, raak jy net verder agter. Die groot hoeveelheid diere van verskillende beesrasse wat jaarliks van die hand gesit word, noodsaak Sussextelers al hoe meer om sáám die Sussexras te bemark. Jong telers het hande gevat en besluit “saamstaan” is die antwoord op sukses.
JONG TELERS
Jong telers het met groot geesdrif en samesyn ouer telers gaan besoek en dit is ’n wensituasie vir almal. Hierdie besoeke is met positiwiteit benader en vrae is met vrymoedigheid gestel. Goeie en praktiese wenke is ook uitgeruil. Elkeen het sy eie mening en ervarings, maar tog het almal saam oplossings vir probleme gekry danksy wedersydse respek.
Een van die voordele wat jong telers na die tafel bring, is hul bedrewenheid met sosiale media. Hierdie tegnologie kan deesdae baie tyd en geld spaar en goeie inligting kan bykans moeiteloos uitgeruil word. Saam kan ons oplossings vir probleme kry.
Die wiel is lankal ontwerp, maar daar is altyd geleentheid vir verbetering. Alle Sussextelers word dus aangemoedig om die kommunikasieplatforms en geleenthede vir samewerking beter te benut.
SUKSES MET SUSSEX
Sussextelers is gelukkig om “rooi goud” te teel. Ná die droogte het vleispryse drasties gestyg en ek glo goeie jare lê voor. Wie sal nee sê vir ’n bykomende 30 kg gewig aan jou speenkalwers deur ’n Sussexbul by jou koeie te gebruik? Teen ’n huidige prys van R32/kg skitter die bykomende R960 in jou sak! Dít is die goud wat Sussextelers laat glimlag. Dít is sukses met Sussex.