Nuwe geslag lei by Huntersvlei
Die Sussexstoetery Huntersvlei stel reeds dekades lank uitstekende teelmateriaal aan telers beskikbaar. Mnr. David Evans is die vierde geslag in dié familieboerdery en is nou die groep se nuwe uitvoerende hoof.
Dit was mnr. David Evans se oupa, Rhys Evans, wat werklik gestalte gegee het aan die Rhys Evans-groep. David se pa, die legendariese mnr. Anthony Evans, het die leisels in 1972 oorgeneem toe Rhys oorlede is. Anthony het tot sy dood verlede jaar die groep se sakebelange uitgebou tot die gediversifiseerde landbou-onderneming wat dit vandag is.
David, wat die afgelope twee jaar vir die graad M.B.A. aan die Universiteit van Pretoria studeer, het reeds ’n paar jaar gelede by die onderneming aangesluit.
“Ons het ’n opvolgstrategie gereed gehad en ek het die voorreg gehad om vyf jaar lank saam met my pa te werk.”
Hy het in September verlede jaar amptelik as die uitvoerende hoof van die Rhys Evans-groep oorgeneem.
“My pa het ’n sterk bestuurspan en stewige fondasie vir my nagelaat. Hierdie ondersteuningstruktuur maak dit vir die Rhys Evans-groep moontlik om in ’n oorgangstyd soos hierdie voort te gaan met besigheid.”
NUWE KUDDEBESTUURDER
Die nuwe era vir die groep is ook in die stoetery sigbaar. Die vorige kuddebestuurder, mnr. Dallas Phillips, het onlangs afgetree, maar sy ervaring en kennis word nog van tyd tot tyd ingespan.
Mnr. Enrico Cronjé is die nuwe kuddebestuurder. Hy is vol lof vir sy mentor.
“Die meeste van my praktiese kennis het ek opgedoen by my voorganger, Dallas Phillips, voor wie ek grootgeword het. Ek het ook baie by die touleiers in die skouring geleer. Die ervare mnr. Hendrik Tonyane het my voor sy afsterwe baie van die praktiese aspekte van veehantering geleer.”
Ondanks sy jong voorkoms is Enrico geen nuweling in die bedryf of by die Rhys Evans-groep nie. Hy het so te sê tussen die Sussexbeeste grootgeword. Hy het ná skool die graad B.Sc. in dier- en plantkunde behaal en daarna sy honneursgraad in omgewingswetenskappe aan die NoordwesUniversiteit verwerf.
“Hier het my geesdrif vir genetika en oorerwing ontwikkel, wat natuurlik alles met stoetteling te make het,” sê Enrico.
“Ek ondersoek gereeld die rekords en boeke van wyle mnr. Anthony Evans aangaande die Huntersvlei-stoetery en die Sussexras. Daar kry ek leidrade oor hoe hy diere geselekteer en sy teeldoelwitte bepaal het. Ek het die voorreg gehad om hom persoonlik te kon ken en weet dat hy my aanstelling nie ligtelik opgeneem het nie. Die stoet se geskiedenis sowel as sy toekoms lê my baie na aan die hart.”
Ná sy studie het Enrico ’n kommersiële Bovelderkudde van 400 diere bestuur.
Enrico het op een van die Evans-familie se plase grootgeword en vertel van sy noue band met die boerdery.
“Ek was van ’n baie jong ouderdom af aan die beeskudde blootgestel. My eerste Huntersvlei-veiling het ek as ’n graadeentjie bygewoon en toe het die gogga al gebyt.
TOEKOMSBLIK
Volhoubaarheid en aanpasbaarheid by ’n veranderende klimaat en nuwe, uitdagende ekonomiese omstandighede, is deel van die kudde se doelwit. Dit sluit die seleksie vir poenskopdiere in. Wyle Anthony Evans het besluit om tot die helfte van die kudde met poenskoplyne te teel.
Die visie vir die stoetery is om die gehalte en standaard te behou waarvoor Huntersvlei Sussex bekend is en waar moontlik te verbeter, hoewel dit geen geringe taak is nie. Terselfdertyd probeer hulle om die stoetery se volhoubaarheid en winsgewendheid te verhoog.
David sê met die uitsondering van verlede seisoen het hy in die afgelope vyf jaar op die plaas min goeie oesjare ervaar.
“Die droogte van 2015’16 het almal se oë oopgemaak. Ons is gedwing om te kyk na die volhoubaarheid van die grootte van ons kudde en die beskikbare weiding. In die proses het ons nog strenger geselekteer en die kudde verklein in pas met ons veld se dravermoë in die somer. Die kudde bestaan nou uit 120 koeie en 40 vervangingsverse.”
DOELWITTE
In die strewe na volhoubaarheid wil hulle beeste vir die vleismark teel wat ’n swaarder speengewig en goeie marmering het, sê David.
Hy verduidelik dat die groep en stoetery se doelwitte rakende volhoubaarheid ooreen moet kom.
“Ons kyk na aspekte, soos hoëdrukbeweiding, bewaringsbewerking op ons lande en hoe om by die mark se stygende vraag na vleis met meer marmering aan te pas.”
Die feit dat beesrasse afkomstig uit Engeland, soos die Sussex, reeds goeie marmering het, is ’n groot voordeel.
ANDER VEEVERTAKKINGS
Benewens die stoetery en kommersiële beeskudde bedryf die Rhys Evansgroep ’n slagplaas en ’n voerkraal.
“Hoewel daar baie uitdagings in die landbousektor is, is ek baie hoopvol oor die toekoms en die geleenthede om beesvleis van uitstekende gehalte te produseer. Ons beesboerderyvertakking, saam met ons slagplaas, is ’n belangrike deel van die diversifisering van ons besigheid, en ek sien uit na geleenthede om hierdie afdelings volhoubaar te laat groei.
“Daar is min Sussexkuddes in die land wat nog nie in die een of ander stadium diere by ons gekoop het nie, en die Huntersvleikudde hou aan om ’n beduidende bydrae te lewer tot die gentiese diversifisering van die Sussexras.