JY KÁN DIT GOEDKOOP DOEN
Moenie dat koste jou van dekgewasse afskrik nie, sê mnr. Jaco Kellerman, tegniese bestuurder van die saadmaatskappy Barenbrug.
Daar ís goedkoop opsies wat jy kan kies wat die moeite werd is, pleks daarvan om ’n stuk grond kaal te laat lê, sê hy.
Jaco noem die voorbeeld van tef, wat die afgelope seisoen teen ’n saadkoste van net R240 per hektaar in die Wes-Kaap geplant kon word.
Gaan kyk na jou behoeftes en besluit hoeveel en wat jy wil plant, is sy raad.
Hy sê daar is ’n toenemende verskuiwing om dekgewasse as weiding te benut as deel van ’n oorkoepelende wisselboustelsel.
Barenbrug bemark bepaalde weidekgewasmengsels vir vyf verskillende hoofdoelwitte: Onkruid-onderdrukking, stikstofbinding, grondverbetering, vesel en proteïenaanvullings. Geskikte gewasse vir onkruidonderdrukking in die somersaaigebied is voersorghum, babala, tef, akkerbone, sunhennep, voerradyse en Boergonje-bone.
Vir stikstofbinding in die somerreënstreke stel hy akkerbone, slingerbone
(Dolichos lablab), Boergonje-bone, sunhennep, voerradys en voersorghum voor. Maak seker dat jy die regte entstof per peulgewas gebruik, sê Jaco. Weidekgewasse wat geskik is vir grondverbetering is voerradyse, rape, beet, sonneblomme, voersorghum, sunhennep, slinger- en Boergonje-bone. Hierdie gewasse kan grond deurlug, organiese materiaal help opbou, grondmikrobes stimuleer en voedingstowwe vaslê. Vir so veel as moontlik bogrondse
veselproduksie beveel Barenbrug voersorghum, babala, tef, sonneblomme, slingerbone en voerradyse vir die somersaaigebied aan. As hierdie verskillende gewasse in ’n mengsel gesaai word, moet dit verkieslik ’n kombinasie wees van plantsoorte wat soortgelyke groeilengtes het. Hou ook in gedagte dat plante met ’n hoër veselinhoud noodwendig met ’n langer groeityd gepaardgaan.
As proteïenaanvulling die hoofdoelwit is, is geskikte plantsoorte Japannese radyse, rape, boerkool (kale), akkerbone, Boergonje-bone en voersorghum. Enkelplantsoorte kan in dié geval oorweeg word, maar ’n kombinasie dra by tot beter onkruidonderdrukking danksy verskille in groeitempo en -patrone. Dié gewasse kan ook vir hooi of kuilvoer benut word.