Pannar-pakket laat droëland blom
In ’n gemengde boerdery moet elke vertakking sy gewig kan dra. Pannar het ’n mielie- en sonneblompakket met basters wat Noordwes se risikofaktore goed trotseer.
Die plaas Wildehondepan naby Migdol het vanjaar ’n goeie reëntyd gehad, al het dit ’n bietjie laat begin, sê mnr. Johann Rousseau. Toe ander mense in Desember en Januarie vakansie gehou het, het hulle geplant vir al wat hulle werd was.
“Ons het so 530 mm van Desember tot Maart gehad. Die eerste goeie reën het eers op 12 Desember geval. Van 10 Desember tot 14 Januarie het ons mielies geplant,” sê Johann. Hy het sy sonneblom van 28 Desember tot 20 Januarie geplant.
Me. Cornel Ferreira, Pannar se verkoopsverteenwoordiger in dié omgewing, is opgewonde oor die opbrengs op Wildehondepan.
“Ek het eers lank ’n ander maatskappy se mielies geplant en het in hierdie seisoen na Pannar oorgeskakel,” sê Johann.
“Die maatskappy se pryse is goed en die resultate van die proewe in die omgewing is uitstekend. Cornel is ook hier om aanbevelings te maak. Met só ’n vennootskap kan ek werk.”
Benewens sy saaiboerdery het Johann ook ’n groot kommersiële Vleismerinokudde. Dit verg raakvat en vasbyt om alles te bestuur.
“My pa is ’n groot mentor vir my en ek leer steeds elke dag by hom,” sê Johann oor sy pa, mnr. Zieg Rousseau.
WITMIELIEPAKKET
Die meerkoppigheid en stapelgeentegnologie van BG 5785BR en PAN 5R791BR is die grootste oorwegende faktore vir Johann.
“Dit is die stroper wat die finale praatwerk doen, maar dié mielies het die klimaat hier baie goed gehanteer en sommige plante het tot vyf koppe gedra.”
Albei hierdie basters is mediumvinnige groeiers en lewer goeie prestasie en stabiliteit vir droëlandaanplantings. Weerstand teen onkruiddoders en insekte is ’n verdere bonus.
“Ek is ernstig oor rentmeesterskap en plant getrou toevlugareas. Dit is belangrik om die tegnologie te beskerm,” sê Johann.
Hy plant sy lande teen ’n laer plantestand om sy natuurlike hulpbronne beter te benut.
“Ek het teen 16 000 plante per hektaar geplant en ons staan nou op ’n stand van ongeveer 14 500 plante per hektaar. Die mielieplante het egter danksy meerkoppigheid daarvoor vergoed. Jy kan nie net ’n hoë plantestand najaag op droëland nie. Ek kry eerder ’n winsgewende 45 ton/ha met ’n laer stand as om teen 24 000 plante per hektaar amper niks te stroop nie.”
Die landerye het tipies sandleemgrond met ongeveer 1015% klei. Johann pas sy bemestingsprogram aan na gelang van grondontledings.
SONNEBLOM
“Ons kyk na risikobestuur en ek wil eers sien watter basters hier die beste volhoubaar sal kan presteer,” sê Cornel. Op haar aanbeveling plant Johann ’n gediversifiseerde pakket konvensionele sonneblombasters.
■ PAN 7033. Dié ou staatmaker is reeds tien jaar in die sonneblombedryf en is geskik vir alle produksiestreke. Dit het ’n goeie prestasierekord en droog stadig af.
■ PAN 7057. Danksy die uitstekende olieinhoud, aanpasbaarheid in alle produksiestreke.
■ PAN 7098. Hierdie drierigtingbaster is die nuwe ster in die Pannarpakket. Dit was die vorige seisoen se toppresterende baster in die proewe van die Landbounavorsingsraad en bied uitstekende opbrengspotensiaal, stabiliteit en goeie aanpaspaarheid.
■ PAN 7100. Met uitstekende stabiliteit oor al die produksiestreke bied dié volseisoenbaster álles: stabiliteit, gebiedsaanpasbaarheid, olieopbrengs en opbrengspotensiaal. “Vir my is opkoms baie belangrik en hierdie pakket se groot sade en groeikragtigheid het my beïndruk,” sê Johann. Hy plant sy sonneblom in rye van 1 m teen ’n stand van 35 000 plante per hektaar.